Esti domingu 24 de mayu la La Plataforma vecinal Salvemos Peñamayor entama la II Simultánea de Cumbres, cola que se movilicen pa oponese a la investigación y estracción de minerales na Sierra de Peñamayor. La música asturiana va tener protagonismu nesta xornada gracies a que Mariluz Cristóbal Caunedo & Llorián García, Ún de Grao y Nun Tamos Toes van actuar a les 16.30h pa poner el ramu a la protesta. Amás, estos artistes sofiten la iniciativa cantando nunos videos qu’estos díes tán espardiéndose per redes sociales.
«Dende Nava y Piloña, de Bimenes a Llaviana sube la xente a La Peña pa defender la montaña de Bimenes y Llaviana. Y con esti cantarucu, téngovos de convidar a que vengáis el domingu a lluchar ya festexar». Esta ye parte de la lletra del cantar n’apoyu a Salvemos Peñamayor qu’interpreten, caún col so personal estilu, Mariluz Cristóbal Caunedo & Llorián García, Ún de Grao y Nun Tamos Toes. D’esta manera los sones de l’asturianada tradicional y renovada y de les pandereteres únese a la causa pola que tán lluchando los y les vecines de Nava, Llaviana, Bimenes y Piloña.
Dende Salvemos Peñamayor tienen bien claru’l so oxetivu cimeru: «caltener el monte y les actividaes tradicionales que mantuvieron esta tierra viva durante sieglos«. Pa ello opónense al permisu d’investigación minera ASTUR A, de 217 cuadrícules mineres, concedíu pol gobiernu asturianu a la empresa británica Technology Minerals PLC y que consideren que «implica la investigación de cobalto, cobre, níquel, oro y plata na Sierra de Peñamayor«, pudiendo tener «consecuencies irreversibles pa la salú, entornu y tierra«.
«Reclamamos la caducidá d’esti permisu d’investigación minera, como recueye la propia normativa minera polos incumplimientos d’Asturmet nel desarrollu de los trabayaos d’investigación y pola imposibilidá de que los desendolque ensin saltase la normativa municipal, como avalen los informes técnicos de Nava y Bimenes», plantega Salvemos Peñamayor nesti momentu.
Pa visibilizar la campaña y sumar fuercies a esta reivindicación, celebren esten esti domingu la mentada II Simultánea de Cumbres que va tener salides a les 10h de Llaviana (La Bahúga), y a les 11h de Bimenes (Fayacava) y Nava (Les Praeres). La llegada a les cumes va ser a les 13h y a les 15h hai xinta en Fayacava. La xornada va rematar a les 16.30h cola presentación del manifiestu de Salvemos Peñamayor y les actuaciones musicales de los artistes que tán interpretando’l cantar de sofitu: Mariluz Cristóbal Caunedo & Llorián García, Ún de Grao y Nun Tamos Toes.
Suscríbite a les nuestres novedaes
