Yá ta en toles plataformes musicales y en YouTube QUEDÉ TONTU TRABAYAR (PERO AGORA SOI MÁS LLISTU), el single nuevu de PVXARRA. El tríu presenta un tema nel que suena hardcore, reggaeton, rock y samplers; too ello con una lletra na que denuncien la precariedá llaboral. El cantar -que ve la lluz con videoclip– asoléyase enantes del conciertu que van dar esti sábadu 23 de mayu en Xixón dientro de la xira que tán faciendo per sales y espacios autoxestionaos d’Asturies.
«La xente ta farta. Farta de la inmediatez constante del mundu modernu, de trabayos con males condiciones, de sueldos qu’enantes daben pa tirar d’una familia y agora nun dan ni pa marchar de casa tos pas», desplica Kosme Fernández, vocalista y lletrista del grupu. «Munchos vense engordando a empreses multimillonaries o sirviendo cafés doce hores al día seis díes a la selmana ensin siquiera poder pagar un alquiler. Pues qué quies que te diga, fales cola xente nel chigre y tán toos hasta los güevos«, añade.
Sobre esti mensaxe’l tríu construyó un cantar que, como desplica Argu, baxista de la banda, «pasa en 40 segundos d’un hardcore-punk a un reguetón cargáu de guitarres, pa finar con un rollu cañeru sosteníu por un sample de Deftones«. «Pasámoslo pila bien faciéndolo», valora la formación, qu’añadió tamién «samples d’un vecín molestu pol ruíu d’un concieru diciendo ‘quiero dormir!!’ y tamién el sample clásicu de Nach onde diz ‘trabaja arma las palabras’ porque lo tenemos visto emplegao como un meme». Los samples complétenlos «una reflexón d’un paisanu» que vieron per Instagram.
«Como siempre intentamos facer daqué simpático y, sobre manera, barato», desplica ente rises Ferla Megía, autor del videoclip. Pa ello decidió «convocar a los chavalos y grabar en directo la pieza diendo en coche los trés. Ficimos unes cuantes tomes y delles veces desconectábase’l bluetooth , asina que teníamos que glayar tol tema de nuevo», añade’l productor y realizador valorando que, anque fuera «bastante cansao» ye «mui divertíu poder echar tiempu colos tos collacios faciendo arte d’esta manera».
El tema calez l’ambiente pal que va ser el próximu conciertu de la xira: esti sábadu 23 de mayu nel Lucy Club de Xixón, con entraes yá a la venta. El 6 xunu van tar en La Traviesa de Piloña dempués d’actuar yá n‘Uviéu, Teberga, Nava y Morcín. «Tamos per contentos. Ta viniendo bastante xente a venos tocar, lo pasamos guai y delles veces hasta convídennos a cenar! Más nun pue pidise…», valoren dende PVXARRA sobre la xira a la qu’añadieron una fecha nueva entá ensin anunciar.
El próximu pasu tiénenlo claro: «tenemos ganes yá de dar los conciertos de dempués del branu pa tocar el discu que con suerte saldrá pa setiembre o asina». Mentanto, el so públicu pue sentilos nesti QUEDÉ TONTU TRABAYAR (PERO AGORA SOI MÁS LLISTU) y nos cuatro temes qu’asoleyaron dende l’entamu del so camín en xunetu de 2025.
Suscríbite a les nuestres novedaes
