Tres del estrenu en directo del so discu nuevu, Cenicientes, el pasáu 18 d’ochobre nel Nuevu Teatru de La Felguera, Marisa Valle Roso anuncia fecha nueva n’Asturies. La cita va ser el 27 de marzu a les 21h na sala Tribeca Live d’Uviéu y destaca por que va ser una oportunidá pa ver a l’artista llangreana nuna sala de conciertos, un espaciu nel que nun ye mui común vela actuar; al facelo davezu en teatros o n’eventos al aire llibre. Les entraes anticipaes yá tán a la venta por 18 euros.
Marisa Valle Roso asoleyaba va unes selmanes SALGUERINAS, un villancicu n’homenaxe a esta tradición navidiega de Piarnu (Castrillón). El tema vio la lluz dempués del llanzamientu’l pasáu setiembre de Cenicientes, el trabayu más completu d’esta artista formáu por diez cantares qu’entemecen el folk col pop y los instrumentos electrónicos y nel que-y canta a les muyeres del carbón o al Tren de la Llibertá. Tamién afonda no más personal, dedicando’l so espaciu a la salú mental, el gran problema de la sociedá del sieglu XXI.
El conciertu d’Uviéu enmárcase dientro de la xira d’esti trabayu nuevu que ye, en definitiva, un cantu al feminismu, la llucha pola xusticia social, la reivindicación de la memoria colectiva asturiana y de la so identidá. Madrid, Barcelona, Huesca, Logroño, A Coruña, Valencia y Bilbao son otres ciudaes nes que Marisa Valle Roso va presentar esti álbum ente xineru y mayu del 2026.
Suscríbite a les nuestres novedaes
