Yá pue sentise’l séptimu adelantu de Cenicientes, el próximu discu de Marisa Valle Roso. L’artista llangreana ta acabante d’estrenar ‘La Manzana’, el videoclip d’un tema que tamién ta disponible en toles otres plataformes musicales. Nél va un pasu más na so apuesta pola electrónica -que yá sonó nel single ‘El pañuelín’ col so ritmu drum&bass- y amás de bases d’esti estilu feches sobre una melodía popular, introduz autotune a la so voz. Too ello ensin escaecer la tradición y con una lletra na que la salú mental ta bien presente.
La mirada a los raigaños asturianos tán presentes nel videoclip gracies a la participación d’una pareya de baille formada por Ramsés Ilesies y Eva Braga. Amás, la melodía del cantar ta inspirada na gallegada tradicional ‘De los tres colores, madre’ recoyía por Alan Lomax na so visita a Asturies en 1952. Tamién participaron na grabación los músicos de la escena’l país Manuel Cordero, Pablo Carrera y Fernando Valle Roso, xunto a les voces de Lena Muñiz, Lucia Fernández, Cecilia Braña, Laura Fernández y Marianela Colomer.
«Les nuestres lluces y solombres; lo qu’amosamos y lo que tapecemos; y esa tendencia a dexar ve siempre la meyor cara. ‘La Mazana’ convida a abrazar tamién la nuestra vulnerabilidá, la nuestra ‘cara B’, non namás polos demás, sinón tamién por nós mesmos», desplica Marisa Valle Roso sobre una lletra protagonizada pola salú mental: «Esti cantar escribílu nun momentu nel que la mio mente y el mio cuerpu bloqueáronse. Y agora namás quiero vevos baillar y saltar con él como si nun hubiera un mañana».
‘La Manzana’ ta producíu por Juan de Dios Martín, el videoclip dirixíu por Juan A. Ros con Nuria Jean como ayudante de dirección y Xosé Ambás y Pablo Carrera como ayudantes de producción. Ye l’últimu adelantu enantes de la publicación dientro d’un mes de Cenicientes, el cuartu trabayu discográficu de Marisa Valle Roso que yá pue acutase en preventa xunto a un pañuelu diseñáu pola artista porruana Nievesita.
L’álbum va presentase en directo‘l 18 d’ochobre nel Nuevu Teatru de La Felguera y nél tán presentes temátiques como’l feminismu, la llucha pola xusticia social, la reivindicación de la memoria colectiva asturiana y de la identidá d’esti país nunos cantares influenciaos musicalmente pola canción d’autor, el pop, la electrónica y la canción asturiana.
Suscríbite a les nuestres novedaes
