El Premiu Camaretá al Meyor Cantar, promovíu pola Conseyería de Cultura, Política Llingüística y Turismu, yá tien finalistes pa la so edición del 2023. El xuráu escoyó los cuatro finalistes: Marisa Valle Roso, Alienda, Jose Manuel Tejedor y Vero Rubio. El Teatru de La Llaboral de Xixón va acoyer el domingu 12 de payares la gala de la decimoquinta edición d’esti premiu. Nella los artistes van defender en directo los cantares y van actuar tamién Algaire, ganadores l’añu pasáu col cantar «Coral y Maera».
El Premiu Camaretá al Meyor Cantar ta dotáu con 6.000 euros, convócalu’l Gobiernu del Principáu d’Asturies cola mira de afianzar, prestixar y arriquecer la creación musical tanto n’asturianu como en gallego-asturianu, y los cuatro finalistes de esta edición son Marisa Valle Roso con «Tonada«. Esta intérprete llangreana lleva dedicada a la música dende la infancia y dende mui pronto destacó como una de les voces renovadores de la tonada, con una trayectoria qu’incluye dellos trabayos discográficos y xires.
Alienda con «Zanca de cabra«. Alienda ye un grupu de power folk, xéneru qu’amiesta música y instrumentos tradicionales asturianos con elementos d’otros estilos. Tienen grabáu l’EP Alendando (2014); y Alienda (2023), el so primer discu de duración llarga del que «Zanca de cabra» salió como adelantu nel 2022 y que tien lletra del escritor Roberto González-Quevedo.
José Manuel Tejedor, con «Les tos nales«. José Manuel Tejedor ye ún de los gaiteros más gallardonaos del panorama asturianu, con tres premios Macallan del festival de Lorient, un Premiu Nacional de la Música y dellos premios AMAS. Fixo abondes actuaciones en festivales intercélticos de toa Europa, foi teloneru d’artistes como Van Morrison y Sinead O’Connor y collaboró colos nomes más destacaos del folk internacional. Esta canción pertenez al últimu trabayu, Lluz, tien lletra de Gema Fernández y pon-y voz Loreto Suárez d’Algaire.
Vero Rubio con «Dixo miou padre«. Vero Rubio ye una multiinstrumentista que toca’l pianu, la trompeta, la trompa y el bodhram. La so carrera desenvuélvese ente’l mundu de la música clásica, onde tuvo la oportunidá de tocar con orquestes como la Orquesta Sinfónica de Barcelona y Nacional de Catalunya (O.B.C.), y el del jazz. Anguaño, toca en dellos grupos de distintos estilos (folk, rock, improvisación llibre, jazz…): Orquesta Céltica Asturiana, Sonámbulos, Improviso… Amás compaxina esti llabor como instrumentista cola composición y producción de la so música de manera independiente.
Suscríbite a les nuestres novedaes
