Marisa Valle Roso estrena con Alba Morena y Rocío Márquez, ‘El pañuelín (Rework)’. Un cenciellu que xune’l folclor cola asturianada pa da-y un nuevu enfoque a lo tradicional, nun planu onde nos tresporta al aquelarre y el so universu.
Detrás del rework, hai una figura que Marisa asitia como l’orixe. José González, El Presi, quien xugaba col folclor como naide, mirábalu dende otru puntu de vista, retorcíalu y consiguía facelo suyo, pero ensin abandonar la sensibilidá que tanto lu caracterizaba. D’él nació la primer versión, y d’esta, agora, podemos escuchar el nuevu proyectu.
«Asturianada y flamencu atópense nesti remix, como-y prestaba a José González. Y pa eso apaez Rocío Márquez. Fuerza y dulzura. Sensibilidá y emoción n’estáu puru. Poques voces remuévenme tanto. Almírola fondamente y tener la so voz en «El Pañuelín» llévalu a llugares inimaxinables», cunta Marisa Valle Roso. «Dende’l norte y dende’l sur, les nuestres voces atópense y Alba Morena completa la ecuación. Elegancia, modernidá y frescura pa tresformar esti cantar en daqué nuevo. Trés artistes y un cantar qu’adulces dexa de ser solo ‘El Pañuelín’ pa convertise nel nuestru propiu aquelarre«, destaca l’artista llangreana.
Alba Morena firma la producción. Les testures, la estructura y la fusión de la voz de Marisa cola de Rocío Márquez son les que faen que’l proyectu medre nuna dirección totalmente nueva, cola mesma llibertá cola que José González xugaba coles sos composiciones. Y dexa claro qu’el folclor y l’asturianada puen compartir espaciu ensin perder identidá.
Marisa Valle Roso foi escoyida pa esta collaboración nel marcu del programa BATEA, una alianza estratéxica ente Esmerarte y la Fundación Paideia Galiza, col oxetivu d’impulsar el talentu musical y acompañar a artistes en fase de crecimientu y afitamientu.
Suscríbite a les nuestres novedaes
