Marisa Valle Roso sigue recoyendo la collecha del trabayu que vien faciendo dende hai dalgo más d’un añu col so discu nuevu, Cenicientes. El feminismu, la llucha pola xusticia social, la reivindicación de la memoria colectiva asturiana y de la so identidá, son los pegoyos so los que se llevantó esti álbum y agora dos entidaes tán acabante d’anunciar que distinguen a l’artista llangreana por esti compromisu y concede-y el Comadre de Oro 2026 y el Premio 8 de Marzo de la Comarca de la Sidra.
La Tertulia Feminista Les Comadres, asociación que lleva 40 años puxando pol feminismu dende Xixón y qu’impulsó el ‘Tren de la Libertad’ al que Valle Roso-y cantó, concede añalmente los sos reconocimientos de Comadres de Oro na estaya d’Artes, Ciencia y Investigación, Deportes y Divulgación. Anguaño, premiaron a Marisa Valle Roso «pol so enorme talentu y el profundu compromisu col feminismu y el folclore de la so tierra, que ye la nuestra».
D’otra banda, el Conseyu Comarcal de Muyeres de la Comarca de la Sidra tamién distingue a la cantautora col Premio 8 de Marzo 2026 poles mesmes razones: «La so obra representa un cantu a la historia obrera, a les lluches feministes y a la fuercia de la tierra asturiana«.
Premios aparte, Marisa Valle Roso ta inmersa nuna intensa actividá artística. Continúa la xira que la va llevar el 27 de marzu a la sala Tribeca Live d’Uviéu, amás de a otres ciudaes del estáu español (Madrid, Barcelona, Huesca, Logroño, A Coruña, Valencia, Murcia y Bilbao); va collaborar con Hevia‘l 15 de mayu nel conciertu qu’esti míticu gaiteru va dar nel Teatru Xovellanos de Xixón; y anteayeri participó na gala n’alcordanza de Tino Casal que se celebró nel Teatru de la Llaboral faciendo una versión de ‘Embrujada‘. Amás, l‘Anuariu de la Música Asturiana 2025 que ta acabante d’asoleyar dedicó-y la portada a esta artista que «vuelve al llar».
Suscríbite a les nuestres novedaes
