Más de 2.000 persones ven la obra del 50 aniversariu del festival de Lorient con participación de Prada, Ambás, Ramsés y Hevia
El llunes 9 d’agostu estrenóse nel Festival Intercelticu de Lorient/An Oriant delantre más de 2.000 persones la obra ‘Finisterres Celtiques‘, una composición que surde de la collaboración ente’l festival y la Orquesta Nacional de Bretaña. La obra tien cinco movimientos, compuestos por Ramon Prada (Asturies), Frédérique Lory (Bretaña), Paul Leonard Morgan (Escocia), Sir Karl Jenkins (Gales) y Bill Whelan (Irlanda). Nella intervienen más de quince solistes de les naciones celtes: Ross Ainslie, Xosé Ambás, Ramsés Ilesies, Abraham Cupeiro, Hevia, Catrin Finch, Anxo Lorenzo, Marthe Vassallo, Fiona Monbet… El proyectu algamó, amás, ún de los premios que concede la Fundación Grand Ouest.
Concretamente’l movimientu compuestu pol asturianu Ramón Prada entitúlase “Tierra” y na so interpretación participaron Xosé Antón Fernández ‘Ambás‘ a les voces, Ramsés Ilesies a les panderetes y percusiones, y José Ángel Hevia a la gaita; amás del músicu gallegu Abraham Cupeiro que tocó’l carnyx.
La propia organización del Festival Intercélticu de Lorient (ún de los más importantes del mundu) comentaba tocántenes a esta obra: «Esti afondamientu nel corazón del mundu celta va llevate en un viaxe musical al traviés d’atmósferes, lleendes, soníos y idiomes celtes. La bayura y diversidá d’estos pueblos asentaos nel Arcu Atlánticu européu foron quien a crear, gracies a l’apertura a los demás y a la esperimentación, una cultura orixinal y evolutiva que sobrevivió a los sieglos».
