Esta tarde remata’l XVIII Festival Internacional de la Mázcara Ibérica (FIMI) que se celebró per primer vegada n’Asturies tres de llevar tou esti tiempu desendolcándose en Portugal. Tres del arranque del eventu la selmana pasada con un conciertu de Felpeyu y otros artistes portugueses y actividaes a lo llargo de tola selmana, Uviéu acueye a les 17h l’actu central del FIMI nel qu’alredor de 600 participantes y más de 30 agrupaciones d’Asturies y d’otros territorios peninsulares van desfilar dende la plaza del Ayuntamientu d’Uviéu hasta’l Paséu del Bombé, onde tamién va actuar el grupu portugués de música electrónica Karetus.
Nel desfile d’esta tarde, por vez primera, van tar representaos tolos territorios de la Península Ibérica, gracies a la participación d’una delegación d’Andorra, que se suma a los grupos qu’aporten dende Asturies, Galicia, Castiella, Cantabria, Extremadura y Portugal. D’esta manera, van convertir a la capital asturiana nun gran escaparate del patrimoniu cultural venceyáu a les mazcaraes. Personaxes ancestrales, rituales festivos, música y tradiciones tresmitíes de xeneración en xeneración van vase cita nun percorríu qu’axunta dalgunes de les espresiones más singulares del patrimoniu cultural européu.
La Conseyería de Cultura, Política Llingüística y Deporte impulsa y financia esta edición col oxetivu claru d’avanzar na protección y l’espardimientu del patrimoniu cultural inmaterial, reforciando’l papel d’Asturies como territoriu de referencia alredor de les mazcaraes tradicionales. Amás, el festival coincide con un momentu especialmente relevante, l’entamu del procesu pa la declaración como Bien d’Interés Cultural (BIC), de calter inmaterial, del conxuntu de les mazcaraes d’iviernu d’Asturies. Un pasu empobináu a garantizar la so protección y tresmisión, pero tamién a reconocer el so valor como parte esencial de la identidá colectiva.
La música asturiana va tar bien presente nesti desfile, porque la tradición de les mazcaraes d’Asturies ta venceyada dafechu a los sones de raigañu del país. Amás, güei van sentise música d’otros territorios y otres manifestaciones artístiques, asina ye como l’artista Clo Bougard va facer una intervención inspirada nes mazcaraes, participen tamién l‘Asociación de Profesionales de la Ilustración de Asturias (APIAST) y actúa nel Bombé n’acabando’l desfile el pernomáu grupu portugués de música electrónica Karetus.
Suscríbite a les nuestres novedaes
