El 29 d’agostu la esplanada del cai de Veiga va acoyer una edición nueva del Unirock, festival que lleva más de 40 años puxando pol rock, metal y punk nesta llocalidá del conceyu Navia. Na edición d’esti añu la música n’asturianu va volver a tar presente gracies al conciertu de la banda punk-folk Skontra y, tamién, a Mala Reputación, grupu rock de Cangues d’Onís que tien dalgunos temes en llingua asturiana.
La música n’asturianu tuvo un papel destacáu y constante dientro del espíritu Unirock, funcionando como un elementu d’identificación cultural y como ferramienta d’espresión social. Dende los sos primeros años, los escenarios venceyaos a esti movimientu dieron cabida a bandes que fixeron del idioma propiu una parte esencial de la so propuesta artística, contribuyendo a la normalización del so usu nel ámbitu de la música popular contemporánea.
Dixebra, La Tarrancha y Misiva fueron dalgunes de les formaciones que canten dafechu n’asturianu que tocaron nesti festival naviegu. Xunto a elles, tamién tocaron Desakato y Mala Reputación -que repite esti añu-, bandes que tienen dellos cantares nesti idioma y que siempre amosaron so compromisu con él.
Nesta edición de 2026 incorpórase Skontra, ún de los grupos n’activo más veteranos de la escena de rock n’Asturies. Formaos en Xixón en 2001, lleven tou esti tiempu faciendo punk-folk pero, en cuenta de beber de los sones celtes d’Escocia o Irlanda, ellos miren pa casa y componen les sos canciones partiendo de la tradición sonora asturiana. Con lletres reivindicatives tanto n’asturianu como en castellanu, tienen cuatro discos publicaos y son una de les bandes que más kilometros percorrió, representando a la cultura asturiana nos principales festivales rockeros del Estáu y faciendo dos xires per Países Baxos y Alemaña.
Suscríbite a les nuestres novedaes
