A finales de 2012 el grupu ska-fusión La Tarrancha asoleyó’l so segundu discu de llarga duración, Mezigayuska y, al poco, entamaron a cavilar nun proyectu nuevu al rodiu d’esti trabayu: Mezillingües. Foi asina como entamó un procesu de más d’un añu de duración, nel que s’implicó una ventena de persones y que remató cola edición d’un álbum qu’incluyía los cantares de Mezigayuska y dalgunos d’Ö-3-3 reinterpretaos en variantes de los tueros llingüísticos del asturllionés, aragonés, castellanu, catalán, euskera, galaicoportugués y occitanu. Reivindicales y amosar que se taba faciendo música en toes y caúna d’eses llingües yera l’oxetivu d’esti discu.
Pa ello, La Tarrancha arrodióse d’una montonera de músicos integrantes d’otres bandes qu’emplegaben los sos respectivos idiomes maternos como formas d’espresión. Ines Osinaga (Gose), Jesús Cifuentes (Celtas Cortos), Guillerme (Quempallou), la occitana Alidé Sans, componentes de toles bandes de rock n’asturianu qu’había daquella (Skontra, Adizión Etílka, N’Ochobre, Misiva, Skama la Rede, Dixebra), los grupos Picä Tumilho, Tarna y Gaire… fueron un total de 19 voces que cantaron a la necesidá d’afitar pontes culturales pa visibilizar otres realidaes llingüístiques y defender los derechos de los sos falantes.
Pa facer alcordanza d’esta iniciativa falamos con Delfín Valdés, vocalista de La Tarrancha y responsable del proyectu Mezillingües, álbum escoyíu agora por Musicasturiana.com como Discu del Mes.
¿Cómo nació la idea de facer esti Mezillingües?
Foi una idea qu’andaba pel maxín dende había un tiempu. La idea de faer daqué en toles llingües de la península siempre tebo ahí, con o ensin La Tarrancha. Esperiencies como’l discu que sacara’l colectivu catalán con implicación de xente d’otros territorios, Llengües Vives, onde participé con K-Nalón y na qu’había bandes y cantares en toles llingües minorizaes, taba presente. El discu aquel saliera pel 2006. Taba’l trabayu fechu tamién colos discos de L’Asturianu Muévese con bandes de tol Estáu cantando n’asturianu, que foi un trabayu que dexó güelga nel tiempu. Tamién hebo una esperiencia d’una banda mallorquina que cantaben temes en llingües bien estremaes, como l’asturianu.
La idea de poder faer dalgo asemeyao prestábanos. Intentar abrir pontes, que la xente d’equí conociera o sintiera música notros idiomes minorizaos (o non), y a la par que los músicos d’otros llugares llevaren la nuestra música, l’asturianu y les otres llingües de vuelta, paecíanos una cosa mui guapa. Una idea yera qu’esto guañara, qu’eses pontes se caltuvieren firmes y siguir trabayando nesi sen. Tamos a tiempu.
«La idea yera intentar abrir pontes, que la xente d’equí conociera o sintiera música notros idiomes minorizaos (o non), y a la par que los músicos d’otros llugares llevaren la nuestra música, l’asturianu y les otres llingües de vuelta, paecíanos una cosa mui guapa»
¿Qué criterios siguistis pa escoyer les llingues presentes?
La verdá que quiximos dar presencia a tolos troncos llingüisticos y una vez metíos en fariña ye cuando empecipies a pensar nello. Y ye que dientro d’esos mesmos tueros, pues atopar el mesmu idioma con nomes estremaos, en realidaes alministratives estremaes, yá sea d’Estaos como’l portugués, l’español, o’l francés, a distintes alministraciones autonómiques y distintes normatives. La idea yera faer música nes llingües del pueblu; dea igual el marcu autónomicu, el nome, o la normativa.
Nel discu hai variedaes llingüístiques que tán tovía más minorizaes dientro de les llingües minorizaes, como ye’l casu del cántabru, el llionés o l’aragonés. Imaxino qu’hubo una intencionalidá de reflexar estes otres llingües más tapecíes y que tamién con ello surdió dalgo d’alderique llingüísticu…
Por pone’l casu, l’asuntu’l català, tien les sos discusiones dientro’l so dominiu; que si català, que si valencià, que si mallorquí. Ye un alderique que nos cai fuera mano, pero que nel casu del asturllionés nun tenemos que perde-y la pista. El casu del cántabru, por exemplu, tócanos más cerca. Esiste l’alderique de que si pertenez al tueru asturllionés, o si pertenez al del castellanu con unes característiques mui específiques… Eso mesmo pasa colo que se conoz como estremeñu o altoestremeñu. Tuvimos entrugando a dalguna xente conoceora del asuntu y creemos que vamos siguir dexando esi alderique nes manes de los filólogos.
Lo que teníemos claro ye que’l cántabru diba tar presente. D’un tiempu p’acó hai un movimientu mui guapu de recuperación y dignificación llingüistica del cántabru y nel planu musical ta presente nun garrapiellu curiosu de bandes que van dende’l folk, la fusión o’l hip hop. Nel casu que cites del llionés, ye simplemente otru nome pa falar de la mesma llingua, otra cosa ye que’l modelu estándar seya distintu. Agora mesmo hai grupos llioneses cantando na variedá de les zones de L.laciana o Babia, qu’en poco s’estrema de si lo fixera un grupu asturianu de Teberga, Somiedu o Cangas del Narcea. Anque’l patrón llingüisticu del llionés nun sea esautamente esi. Asina que pa respondete, sí, la idea yera la de dar visibilidá tamién a toa esa varieda. Por poner el casu, col galaicoportugués tenemos un cantar en gallego-asturianu y otru nel gallegu de la parte do Morrazo.
«Hubo alderiques colos tueros llingüísticos y variedaes recoyíes. Tuvimos entrugando a dalguna xente conoceora del asuntu y creemos que vamos siguir dexando esi alderique nes manes de los filólogos»
¿Por qué escoyistis a los artistes qu’escoyistis p’andechar con vos?
Yera xente que nos prestaba, artistes que siguíemos, que taben trabayando y faciendo coses d’aquella y cola que pensábemos que diba tener entrá la propuesta de Mezillingües, porque entendímos que la so sensibilidá diba pel mesmu camín.
¿Cómo foi la esperiencia de collaborar con ellos?
Foi una esperiencia prestosa. Llevó trabayu: contautar con bandes, con artistes, asperar la so rempuesta… Caúna tenía la so axenda propia y tenía qu sacar tiempu y trabayu pa esto… El fechu de que saliera alantre ye gracies a ellos.
«Llevó trabayu. Alredor de venti persones llegaron a tar implicaes nun procesu que llevó más d’un añu y nel qu’hubo qu’escoyer temes, contautar colos artistes, mirar estudios, faer les traducciones, redautar noticies en tolos idiomes…»
¿Y el procesu xeneral de facer esti discu?
Más duro de lo que paez. Hebo que formase y infomase un puquiñín más sobre les cuestiones llingüístiques, escoyer los temes, faer les traducciones, contautar coles artistes, mirar estudios equí y acullá, concretar calendarios, redautar noticies en tolos idiomes, buscar medios de comunicación sensibles a la propuesta… Alredor de venti persones llegaron a tar implicaes naquello. Damé que too eso llevó más d’un añu trabayu. Mira tú, pa depués vender el discu a 6 euros (rises).
¿Llegastis a interpretar en directo dalguna versión nestos otros idiomes del vuestru repertoriu?
Sí claro, anque en dalguna llingua namás qu’una vez.
¿Qué acoyida tuvo’l trabayu tanto dientro como fuera d’Asturies nel momentu de la so publicación?
Pa un grupu como La Tarrancha, cola poca repercusión mediática que podíemos tener d’aquella (menos qu’anguaño), pos la verdá, que fuera nun tebo mal. Nun quier dicir que se publicitara muncho, pero la xente sensibilazao, dalgo enteróse. N’Asturies, igual non tanto. El discu presentóse’l 31 de xineru del 2014 nel Lizeo Antzokia, de Gernika-Lumo. Seguro que t’alcuerdes, porque dalgo tienes que ver con too aquello (*nota del entrevistador: esi conciertu surdió gracies al trabayu fechu con Ixuxú Asturies-Euskal Herria Elkartea, iniciativa que desendolqué p’averar cuestiones culturales y sociales País Vascu, onde taba emigráu daquella), que diba collaborar Inés Osinaga de Gose, pero nun pudo. La que sí que vino dende’l Val d’Aran foi Alidé Sans, a cantar n’aranés (occitanu). Esi añu diemos una bona riestra conciertos, Galiza, Lleón, Cantabria, La Rioja, Asturies, Euskadi…
Yá pasaron 11 años… ¿Qué balance faes d’aquella esperiencia?
Pos que si nun llegues faeme la entrevista, la mayor parte les coses ya nin m’alcordaba (rises). El balance que faigo ye positivu, el de conseguir faer daqué que tienes en mente, el d’alcordame d’aquelles ilusiones y aquella gana trabayar. ¡Yá podía tener l’enfotu d’aquella! Agora col tiempu, dame que foi un proyeutu necesariu y guapu. Que yá lo yera.
Suscríbite a les nuestres novedaes
