Esti vienres 14 a les 19.30h la música’l país tien una cita imprescindible. L’escenariu va ser el Muséu Casa Natal de Xovellanos; el motivu el Ciclu Folk de Cámara Ígor Medio; y los protagonistes, trés persones fundamentales de la escena: Xosé Ambás (voz), Pepín de Muñalén (flautes) y Vero Rubio (pianu). Xuntos van estrenar un proyectu musical nuevu que yá tien nome pero hasta’l día d’esti conciertu nun lo van anunciar.
«Hai mes y pico Pepín faló conmigo pa ver si m’animaba a facer dalgo pal Ciclu Folk de Cámara Ígor Medio y dempués de tantos años paráu na música folk -porque últimamente dedícome más a lo tradicional, de pandereta y de baille-, préstabame facer daqué«, desplica Xosé Antón Ambás sobre l’orixe d’esti grupu nuevu que tien como «catalizador» a Pepín de Muñalén: «la propuesta de facer el tríu con Vero Rubio tamién foi d’él». Tamién tuvo dalgo que ver la madre d’Igor Medio, Sonia Tuya, a quien-y «prestaba» qu’estos músicos participaren nesti ciclu n’alcordanza del so fíu.
Asina ye como nació un tríu nuevu del qu’Ambás quier dexar una cosa mui clara: «Esto nun ye Tuenda. Tuenda foi Tuenda y Tuenda acabó cuando nos dexó Elías». Sicasí, esti proyectu nuevu sí que tien coses en común con aquel recordáu tríu de la música’l país: «comparte que somos un tríu, que tamién tamos Pepín y yo nesi tríu y que trabayamos col repertoriu tradicional del ATOAM (Archivu de la Tradición Oral d’Ambás); pero nun queremos que se confunda con Tuenda, porque yá nun existe y lo que tamos faciendo agora ye otra cosa«.
«Vero Rubio ye la clave d’esta formación y la persona que-y va dar identidá», destaca’l músicu moscón. Pa él foi «un descubrimientu Vero Rubio como persona, como música y como sensibilidá pa trabayar con esti repertoriu tradicional». Tamién foi «una novedá», porque Ambás nun la conocía personalmente y tampoco tenía cantao con una pianista: «trabayar la música tradicional con un instrumentu que me ye tan estranu como’l pianu foi un apueste mui particular; nun sabía a qué m’enfrentaba, si me diba gustar o si diba tar agusto».
D’esta manera xúntense «trés músicos del occidente: Vero Rubio de Cangas; Pepín del Cuartu Los Val.les de Tinéu ya Ambás de Salcéu, del conceyu Grau. Trés falantes d’asturianu occidental ya trés músicos de corazón pésico. Esto va marcar la nuestra identidá ya va pesar más nel nuestru repertoriu», sorraya Xosé Antón Fernández matizando sicasí que’l repertoriu del tríu «representa xéneros distintos de la música tradicional asturiana, estremaes zones xeográfiques d’Asturies y diferentes variantes llingüístiques».
«Un repertoriu novedosu y tranquilu pa escuchar, pa tar sentadinos y sentir la música del país vestida con flauta, pianu y voz«, eso ye lo que’l grupu va amosar nel conciertu d’esti vienres. Ambás afirma qu’ellos tán «mui contentos y agusto» col resultáu y con ganes de «ver la reacción de la xente». Falta por saber una cosa; el nome del tríu. «Tenémoslu yá pero presentarémoslu nel conciertu», asina que quien quiera ver «el bautizu de la criatura» que s’avere esti vienres a les 19.30h al Muséu Casa Natal de Xovellanos.
Suscríbite a les nuestres novedaes
