Dos años dempués de llanzar el single audiovisual ‘Pela carretera’, la banda mecigayu ska La Tarrancha regresa con un cantar nuevu acompañáu de videoclip: ‘L’alcordanza encesa’. El tema ye un alegatu a tener presentes a tolos seres queríos que yá nun tán ente nós; un glayíu a caltener viva la llama del recuerdu a güelpe de punk y ska; una pieza enllena d’emotividá, qu’homenaxea al pasáu cola mirada puesta nel presente y nel futuru.
«La madre presente, el padre presente. Presente l’hermanu, la hermana, los güelos. Presente l’amigu, l’amiga, Presentes los echaos al monte. Les que nunca callaron. Presentes les que fendieron cadenes. Presente l’amor de la to vida. Presente la muerte, pero más presente la vida«, ye parte de la guapura de la lletra d’esti cantar que foi grabáu nos Tutu Estudios de Corvera baxo la producción de Sergio Rodríguez y que ta acompañáu d’un videoclip fechu pola realizadora sierense Leti Cienfuegos.
Precisamente, la obra audiovisual ye ún de los pegoyos d’esti cantar, que-y da tovía más xacíu y emotividá a la pieza. Nel videu salen difuminaes les imáxenes de seres queríos de La Tarrancha y de collacios y collacies de la banda que quixeron mandar les sos semeyes. Tamién salen artistes rellacionaos cola cultura y personaxes de la historia social recién qu’entá ensin tener una rellación directa col grupu, dexaron la so buelga nél y/o representen simbólicamente a muches figures con nome o anónimes que La Tarrancha quier tener presentes.
‘L’alcordanza encesa’ asoléyase agora en YouTube y nos próximos díes va tar tamién presente en toles plataformes musicales. Amás, nun ye’l únicu cantar nuevu del grupu mecigayu-ska; tamién grabaron hai unos meses otru tema nos Tutu Estudios: ‘Desaprendi a respirar‘. Ye un pieza más ska, con influencies reggae y que tampoco dexa de llau la contundencia punk qu’acompaña a La Tarrancha dende va años. Un reflexu de la personalidá d’esta banda que lleva más de dos décades axuntando compromisu social, humor, folixa, baille y llucha.
Suscríbite a les nuestres novedaes
