Misiva llanza’l videoclip “Mar Adientro”, adelantu del so EP

Esti vienres 16 d’avientu asoleya l’EP nuevu de Misiva, Mala Relixón. La banda moscona va regresar con cuatro cantares qu’amuesen la so evolución y un estilu más rock, ensin dexar de llau al punk-rock que lleva marcando los más de doce años que lleven n’activo. “Mar Adientro” ye’l single escoyíu, del que yá se pue ver el videoclip fechu pol prestixosu realizador Titi Muñoz.

«El videu cunta la hestoria de cualquiera de nós. De cómo dende que nacemos van metiéndonos patrones ya programes hasta que nos damos cunta de que tamos viviendo una vida que nun escoyimos. Fala de volver al orixe. De renacer de lo que conocemos. Renacer “Mar Adientro”», comentó’l grupu nes sos redes sociales pa presentar el cantar.

Cola so octava referencia discográfica que ta a piques d’aportar, Misiva quieren tresmitir un mensaxe nidio: «Fartos de tanta escuridá, de tantes males noticies y de tantes pérdides que llevamos viviendo dende va dos años, queremos alzar la voz pa dicir que nun podemos dexanos llevar por toda esa inercia negativa. Que siguimos más vivos que nunca y que tócanos a nós romper con esa “Mala Relixón” que nos inoculen dende les redes sociales y dende los medios y que nos tien alloriaos ensin dexanos ver la viesca qu’hai tres de los árboles». El cantante del grupu, Humberto Sierra, resume asina la filosofía presente nesti trabayu.

Evolución

Amás, Sierra define l’estilu d’estes nueves canciones como «los Misiva de siempre pero menos previsibles que nunca» y sorraya la «madurez» y la «llibertá creativa» que van dar forma a Mala Relixón. «Van ser cuatro cañonazos que siguen el camín un poco más rockeru de L’Últimu Aliendu y de La Misiva, anque ensin perder la esencia de lo que llevamos faciendo dende va más de doce años». Esti vienres van poder sentise estos cantares nuevos qu’amuesen la constancia y vitalidá d’esta banda que tien un estilu únicu dientro de la escena n’asturianu.

Comprar discos de Misiva na tienda online