El 25 de marzu hai cita col punk n’asturianu n’Uviéu. La banda moscona Misiva va presentar en directo’l so trabayu nuevu Mala Relixón nun conciertu nel que van tar acompañaos de la formación carbayona Ochobre. L’eventu va ser na sala Gong d’Uviéu a les 20.30h y les entraes anticipaes yá tán a la venta online por 10 euros.
Mala Relixón yel’EP nuevu de Misiva. Nesta séptima grabación d’estudiu, la banda moscona ruempe cola llínia d’escuridá y rabia de los sos primeros discos, pa presentar un soníu más averáu al del cenciellu «La Misiva«, publicáu’l pasáu marzu. Los cuatro cantares dan-y dan una vuelta de tuerca al estilu, a la temática y a la música que lleven faciendo dende va más de 12 años.
Nesti EP la banda punk rock presenta «cuatro cañonazos enllenos d’enerxía, de riffs mui curiaos y de voces sorprendentes». En cuantes a les lletres, n’elles falen de «frayar colos patrones y los programes nos llanten dende neños y de volver al orixe, a la esencia de caún». «Ye un glayíu d’esperanza y un invitación a mirar pa dientro, que ye onde tán al final toles respuestes», comenta’l grupu.
Ochobre teloneros
Per otru llau, Ochobre ye un grupu de punk formáu en 2016 por músicos que vienen del metal, de les bandes de gaites, del swingcore y del punk. Influenciaos por grupos como Dixebra, Skontra o Desakato, faen punk acompañáu de gaita que siempre dexa sitiu pal ska o cualquier otru ritmu que llame a mover los pies y a lluchar pola xusticia social. En 2020 renovaron la so formación cola incorporación d’una cantante femenina y nuevu guitarrista; con esta novedá asoleyaron el single “¡Autodefensa, muyer”, qu’acolumbra el nuevu camín que va percorrer esta moza formación.
Suscríbite a les nuestres novedaes
