Videu resume y semeyes del Semando Fest
«La música moza n’asturianu xorreció». Con esi títulu presenta musicasturiana.com el videu resume del Semando Fest que yá pue vese na canal de YouTube del portal. Grabáu y realizáu audiovisualmente por Lucía Garó (Avilés, 2001), ye una esbilla de los preparativos, de les actuaciones musicales d’Alicia Villanueva y Luis Álvarez Pola, Loína, Algaire y Llevólu’l Sumiciu, y de la emoción y diversión d’un públicu qu’enllenó la sala Lata de Zinc nel primer festival de música moza n’asturianu.
Amás del videu oficial y del reels que musicasturiana.com asoleyó n’Instagram -nel que se capten dellos momentos del bon ambiente qu’hubo ente’l públicu-, tamién ta disponible la galería de semeyes que fizo la fotógrafa avilesina pa captar dalgunos de los momentos d’esti eventu que dalguna xente calificó yá de «históricu» pa la música asturiana. Musicasturiana.com y Ixuxú Cultura fueron los organizadores del Semando Fest que patrocinó la Conseyería de Cultura, Política Llingüística y Turismu, Caja Rural de Asturias, Conseyu de la Mocedá del Principáu d’Asturies y Conseyu de la Mocedá d’Uviéu; y que cuntó cola collaboración de Cecilía Díaz Art, Héroes Ensin Nome, Lucía Garó y Puru Remangu.
