Un 6 de xineru de 1987, nunes cocheres de Castañeda (Corvera), axuntábense cuatro rapazos col enfotu d’entamar un grupu de rock que cantare n’asturianu; aquello foi l’orixe d’una de les bandes más importantes del panorama musical del país: Dixebra. Pa festexar esti 35 Aniversariu, el grupu va entamar una serie d’actividaes y iniciatives que van espardise a lo llargo de tol añu 2022. Nesti sen, presenten agora’l logu que los va acompañar en toes elles (creáu pol diseñador uviedín Eduardo Carruébano); y, ente otres coses, anuncien la dixitalización y publicación a traviés del AMCA (Archivu de la Música Contemporánea Asturiana) de la primer maqueta de grupu, la inauguración d’una esposición, la producción d’un documental, la edición d’un llibru, amás de la publicación del so décimucuartu discu de llarga duración ‘Ente la Niebla‘.
De manera ininterrumpida a lo llargo d’estos trenta y cinco años, Dixebra foron iguando un estilu propiu, reconocible y orixinal que se sofita en tres premises básiques: emplegu esclusivu de la llingua asturiana, lletres comprometíes y descriptives de la realidá asturiana, y utilización de la gaita y elementos de la tradición sonora asturiana. Musicalmente tienen evolucionao dende un soníu rudu y básicu, onde’l punk yera l’estilu predominante, a otru muncho más mestizu, variáu y con infinidá de matices, nel qu’entren toa clas d’influyencies: ska, reggae, funk, rap, metal, folk…
Delles de les sos composiciones tiénense convertío en verdaderos himnos y reflexen como naide la realidá social, llaboral, política o cultural d’esta tierra, como ye’l casu de «Rapaza nacionaliega», «Nun llores», «Mañana fría», «La danza», «Canciu d’amor», «Tía Nemesia», «Indios», «Don Vito» y munches otres. Tanto ye asina que puede siguise la historia recién d’Asturies al traviés de les sos lletres, onde faen referencia a munchos de los acontecimientos y socedíos que se desarrollaron nes últimes tres décades. Amás, el so compromisu y solidaridá llevólos a tocar desinteresadamente por causes y colectivos como la insumisión, contra el paru y la probeza, los despidíos de Duro Felguera, el sector naval, la oficialidá del asturianu, la minería, contra la guerra n’Irak o n’apoyu de represaliaos por movilizaciones socio-llaborales.
La dixitalización de la so primer maqueta, una esposición, un documental, un llibru, una xira especial, amás de la publicación del so nuevu discu, van ser dalgunes de les acciones pol 35 aniversariu.
Curtíos en milenta conciertos, fixéronse con un merecíu prestixu como poseyedores d’ún de los meyores directos que se pueden ver n’Asturies. Nesti tiempu percorrieron prácticamente tola xeografía asturiana, amás de bien de salíes fuera d’ella (con incidencia bultable en llugares como Euskal Herria, Galicia o Cantabria), llegando a tocar tamién per Europa (Bretaña, Occitania, Valonia, Laponia, etc). Hai que destacar que foron el primer grupu de rock asturianu en participar nel afamáu Festival Intercélticu de Lorient o nel Liet International. Otra manera, el so llabor discográficu llevólos a la publicación d’una quincena de discos.
Primeres acciones pol 35 aniversariu
Depués d’entrar nel estudiu de grabación el pasáu mes d’ochobre, Dixebra tán yá rematando lo que va ser el so próximu trabayu, un discu-llibru tituláu ‘Ente la niebla‘, con venti temes orixinales que xiren alredor de la historia de les clases populares asturianes. Tamién anuncien que na primavera va inaugurase una esposición sobre la so trayectoria y tolo qu’arrodia a la filosofía de la banda; van facer una xira na que s’inclúin dellos conciertos especiales; hai previsto tamién la producción d’un documental y, como remate, ún de los sos fundadores y cantante, Xune Elipe, va publicar un llibru sobre’l contestu y circunstancies nes que Dixebra tuvo que desenvolver el so llabor.
De too estes actividaes van dir dando anuncia y información completa a midida que s’acerque’l momentu precisu. Too ello pa festexar qu’aquellos cuatro rapazos de la primer formación, convirtiéronse col tiempu nuna banda amplia de nueve músicos que siguen col mesmu puxu y ilusión del primer día, ufiertando actuaciones ensin fuelgu, dinámiques y conectando col públicu como pocos.
Suscríbite a les nuestres novedaes
