Musicasturiana.com entama una nueva estaya de playlists nel so perfil de Spotify. Inspirándose nes This Is: que la plataforma musical sueca dedica a artistes de renome, Musicasturiana.com va facer lo propio centrándose nos cantares de los grupos más destacaos de la música’l país. Dixebra inaugura esta sección con Esto ye: Dixebra, una llista de reproducción qu’axunta 35 cantares del grupu más destacáu del rock astur.
La escoyeta musical d’estes playlists nun respuenden namás a criterios algorítmicos o a los temes más populares de cada formación. Un exemplu d’ello son les más de dos hores de música que suena n’Esto ye: Dixebra y qu’axunta cantares de tola discografía del grupu, rareces, temes perconocíos y otros que nun suenen nos directos d’esta formación, pero que tienen una calidá bultable. Tamién reflexen nesti casu la diversidá sonora y temática del grupu avilesín, escoyendo distintos los sones -punk, rock, folk, ska, funk, rap-metal…- y delles de les causes a les que cantó’l grupu a lo llargo de 37 años..
Dixebra ye, ensin duldes, ún de los grupos más destacaos de la escena musical asturiana: de pioneros del rock na so llingua a decanos d’esti xéneru musical. Tienen espublizao más d’una docena de discos, toos ellos aclamaos pola crítica especializada y pol públicu; los numberosos reconocimientos que-yos concedieron y la enerxía de los sos directos dan cuenta d’ello.
Al traviés de les sos lletres y la so música ta escrita bona parte de la historia de l’Asturies contemporánea. Testos que falen de la realidá cotidiana, de problemes llocales y globales, de compromisu políticu, de denuncia social… too ello col asturianu como mediu d’espresión. No musical, ye un grupu de rock eclécticu qu’apuesta pola fusión ensin prexuicios. La pluralidá d’influencies estilístiques tien que ver cola diversidá de gustos y intereses de los sos componentes: rock, punk, ska, rap, reggae, jazz, folk, funk…
Dixebra lleva más de 37 años enriba los escenarios reflexando dalgunos de los grandes retos del mundu global actual: el diálogu intercultural, la multiculturalidá, la valorización de les minoríes identitaries, o la importancia de l’acción llocal pa camudar el mundu global.
Suscríbite a les nuestres novedaes
