Ayeri, 30 de xunetu, inauguróse’l Festival Arcu Atlánticu de Xixón con un conciertu de Tanxugueiras pal recuerdu. Les pandereteres y cantantes gallegues actuaron nuna Plaza Mayor enllena xente y tuvieron dellos xestos pa cola cultura asturiana: convidaron a baillar a Óscar y Paula Vega -del Grupu Folclóricu Trebeyu y componentes d’Abéu-, tocaron «L’Amudar» y glayaron pola oficialidá del asturianu nel final del conciertu, lluciendo la bandera de la Xunta Pola Defensa de la Llingua Asturiana.
Óscar Vega cunta pa musicasturiana.com que la collaboración xurdió gracies a Artur Puga, ún de los bailladores qu’actuó con Tanxugueiras na preselección pa Eurovisión en 2022, y que conocen en Trebeyu dende que participaren el branu pasáu nel festival qu’organiza en Vigo’l so grupu de baille, A Buxaina. «Cuando descubrimos que Tanxugueiras viníen, vimos una oportunidá guapa pa baillar con elles. Pusímonos en contautu con elles al traviés d’Artur y foron elles les que propunxeron baillar una muñeira dientro d’una especie de sección más tradicional del conciertu na que toquen una pieza que se llama «O Querer» -del so segundu discu-, un maneo, una muñeira y «L’Amudar«, asina un poco más especial por tar equí en Xixón».
Nos momentos previos al conciertu, Sabela Maneiro, Aida Tarrío y Olaia Maneiro recordaben con Óscar y Paula que «deprendieron «L’Amudar» de María de Trabáu nunes fiestes qu’había en Piornedo va munchos años y que, agora, como tornaben a Xixón, queríen facer un guiñu», desplica Vega. Esta actuación supunxo l’arranque del Festival Arcu Atlánticu en Xixón, eventu nel que la música asturiana ta bien presente y que, dempués de que l’anterior equipu de gobiernu lu cancelara en 2019, recupera anguaño l’actual Ayuntamientu.
Semeyes cortesía de David Varela.
Llueu de la inauguración d’ayeri, l’Arcu Atlánticu continúa cola siguiente programación de música asturiana (amás d’otres actividaes):
Miércoles 31
Xueves 1
Vienres 2
Sábadu 3
Suscríbite a les nuestres novedaes
