El 8 de febreru a les 21h la sala Lata de Zinc d’Uviéu va acoyer el III Semando Fest, festival de música moza n’asturianu. Nél van participar Abéu, Ferla Megía, Alienda y Melandru. Son distintos estilos pa reflexar la diversidá sonora de la música asturiana y con una característica común: la mayoría de los sos componentes son menores de 35 años.
Como novedá d’esta tercer edición, dende Musicasturiana.com llanzamos la Semando Folk Session, una oportunidá pa que toles músiques y músicos mozos que quieran, andechen pa interpretar a comuña los sos temes preferíos de la música tradicional y folk asturiana. La cita va ser el vienres 7 de febreru a les 22h en L’Esperteyu (Uviéu), ún de los chigres más emblemáticos d’Asturies, venceyáu a les populares sesiones folkis de los xueves.
Queremos crear un espaciu amable y collaborar nel camín d’afitar el relevu xeneracional que la música asturiana necesita -un trabayu que yá vienen faciendo delles músiques de la escena como Celia Nieto (Draque, Corquiéu, Entós) con iniciatives asemeyaes a esta-. Anque nun ta pensada pa ser una slow session, prestaríanos que tola xente tea cómoda y puea sentise llibre pa participar, polo que, si nun ties muncha esperiencia pero ties gana, ¡nun t’esmolezas! Vamos tar ellí pa recibite y acompañate. Amás, col envís de facilitar el bon desendolcu de la nueche, abrimos esti formulariu que, nun siendo obligatoriu pa poder tocar y asistir, animámosvos a enllenalu colos vuestros datos y propuestes.
Semando música moza n’ast
Pa celebrar esta tercer edición del Semando Fest, va una selmana asoleyamos la playlist Semando música moza n’ast. Anque apaecen nella cantares d’anguaño y d’antaño d’estilos estremaos, pue ser un bon puntu de partida pa entamar la Semando Folk Session.
Suscríbite a les nuestres novedaes
