A finales d’ochobre MUSICASTURIANA.COM participó nel BIME PRO 2024, ún de los eventos más importantes de la industria musical del Estáu español. Ellí tuvo conversando con responsables d’estremaes entidaes que puxen pol sector musical de los sos territorios. Tres d’asoleyar la entrevista con Fernando Garayoa, responsable de Navarra Music Commision y con Manuel Cebrián, director del Instituto de las Industrias Culturales y las Artes de Murcia; rematamos esta serie d’entrevistes con Arkaitz Villar. Ye’l resposable de Musika Bulegoa, una entidá privada con financiación pública –pal 2025, el gobiernu vascu concede-y 490.000 €– que puxa pola industria musical vasca.
¿Qué ye Musika Bulegoa?
Musika Bulegoa ye una asociación sectorial de la música d’Euskal Herria. Ta compuesta por cuatro grandes asociaciones, que son Kultura Live -l’asociación de sales de conciertos-, MIE -l’asociación d’empreses del sector de la música-, Musikagileak -que ye l’asociación de compositores-, y Musikari -l’asociación de músicos-. Ye una asociación privada con financiación pública. A lo llargo l’añu facemos proyectos estremaos de promoción, sensibilización, formación, difusión esterior… Nesti casu, tamos en BIME por esa sección de difusión esterior que consiste en promocionar la música d’Euskal Herria fuera de les nuestres llendes.
¿Cuándo, cómo y por qué nace?
Nació en 2015. Yera una petición del sector, que nesa época taba compuestu por eses cuatro grandes asociaciones que yá comenté. P’axuntar fuercies, pa promocionar el sector -non namás nel sen de comunicar, sinón también de fomentar aliances, collaboraciones, espoxigue del sector, formación, etc-. Per otru llau, pa facer lobby nos estudios de mercáu, ver los retos del sector, les necesidaes y, en base a eso, siguir trabayando y llevantar los proyectos necesarios p’algamar los oxetivos.
«Nacimos en 2015 p’axuntar fuercies, fomentar aliances, collaboraciones, formar al sector… y tamién facer de lobby nos estudios de mercáu, ver los retos del sector, les necesidaes; y trabayar pa llevantar los proyectos necesarios p’algamar los oxetivos»
¿Cuála ye la rellación col gobiernu vascu? ¿Cómo ye’l procesu d’establecer esa rellación con ellos?
Hai una rellación directa de comunicación continua, constante. Treslladamos al Departamento de Política Lingüística y Cultura del gobiernu vascu tolo que’l sector necesita, los retos, los problemes… Tenemos que presentar el proyectu coles memories pal xustificar la subvención y, mientres dure l’añu, aconceyamos pa facer un siguimientu del proyectu, analizando si se cumplieron los oxetivos, cuálos son los retos nuevos y demás. Amás, tenemos una collaboración que se llama Basque Music. Ye una marca de promoción de la música d’Euskal Herria fuera de les nuestres fronteres y una andecha ente’l gobiernu vascu, l’Instituto Vasco Etxepare y Musika Bulegoa. Nesti casu, Musika Bulegoa fai’l llabor técnicu.
«Basque Music ye una marca de promoción de la música d’Euskal Herria fuera de les nuestres fronteres y una collaboración ente’l gobiernu vascu, l’Instituto Vasco Etxepare y Musika Bulegoa»
¿Sabes datos del impactu económicu de la industria musical vasca?
Yo nun soi la persona que ta trabayando esos datos, son les mios compañeres y compañeros. Pero ficimos apocayá un estudiu col Observatorio Vasco de la Cultura. Nesti momentu tamos analizando los resultaos. Pienso que pal final d’esti añu o entamos del viniente van facese públicos.
Sobre la cuestión llingüística, ¿apóyase namás la música n’euskera o tamién la música en castellán? ¿Hai una visión de normalización llingüística?
Apoyamos la música fecha n’euskera, ye ún de los primeros retos y oxetivos que tenemos, pero nun tien por qué ser discriminatoriu hacia la música fecha n’otres llingües. Esti martes nel BIME, por exemplu, tuvimos un showcase na sala Stage Live y había tres grupos: Montana -que canta en castellán-, La Furia -que canta en castellán-, y EZEZEZ -que canta n’euskera-. Trátase de buscar l’equilibriu ente les propuestes, la presencia de la muyer sobre l’escenariu… Hai varies característiques qu’intentamos cumplir.
«Les diferentes estratexes de residencies artístiques o showcases qu’entamamos resulten n’actuaciones en festivales fuera d’Euskal Herria o, nel casu de les residencies -que munches veces se faen ente un artista euskaldun y ún del exterior-, desendolquen una publicación, cantar, conciertu, taller o un documental»
¿Recoyéis resultaos de la vuestra acción? ¿Cómo repercutió’l vuestru llabor nestos nueve años que lleváis funcionando?
Agora tamos faciendo unos análisis y evaluaciones pa ver qué impactu tamos teniendo nel sector, y tovía más con esti tipu d’acciones que facemos nel BIME, Womex, Eurosonic Noorderslag, Classical NEXT o’l Mercat de la Música de Vic, que son les principales feries a les que vamos. Nun pueo avanzate pel momentu nengún datu de la repercusión que tenemos, pero sí vemos que les diferentes estratexes de residencies artístiques o showcases qu’entamamos resulten n’actuaciones en festivales fuera d’Euskal Herria o, nel casu de les residencies -que munches veces se faen ente un artista vascu o vasca y ún del exterior-, desendolquen una publicación, cantar, conciertu, taller o un documental, como’l que tamos acabantes de grabar en Guinea Ecuatorial. Ye verdá que nos falten esos resultaos en porcentaxes y datos económicos de la repercusión que tienen les nuestres acciones.
De toes maneres, sí que tais viendo demanda y participación nes xornaes de formación qu’organizáis…
Sí. Equí nel BIME, por exemplu, organizamos un alcuentru de profesionales de la industria vasca cola industria colombiana onde hebo al rodiu de 30 persones de dambos países trabayando xuntes, conociéndose, un proyectu de networking. Ficimos también una sesión pitch cola sala enllena -quedó fuera xente-, sobre 70 persones. Ayeri ficimos un alcuentru de patrocinadores de marques pa patrocinios na industria musical o productos musicales onde también hebo unes 30 persones del sector. Hai interés en buscar nueves formes de financiación.
«Nel BIME d’esti añu organizamos un alcuentru de profesionales de la industria vasca cola industria colombiana, ficimos una sesión pitch y un alcuentru con marques pa patrocinios na industria musical»
Pa finar, amás de les actividades que yá dixisti, ¿qué otres consideres les más destacaes de les qu’entamáis en Musika Bulegoa?
Tenemos abondes formaciones. Por exemplu, de propiedá intelectual -impartida por Ainara LeGardon-, dirixida a los nuestros socios y socies. Organizamos tamién los premios de la música tolos años, un reconocimientu al llabor musical nun añu n’Euskal Herria. Dempués, tenemos Soinua Iratzarri, un proyectu que trabaya nes ikastolas pa que la reciella s’avere al mundu de la música contemporánea trabayando col compositor o compositora y presentando la pieza en directu na fiesta final de cursu. Amás, tenemos dos alcuentros con programadores de teatros: DA! PRO -que se fai n’Azoka de Durango-, y otru n’abril. Fáese una convocatoria, escuéyense diez proyectos y los presenten durante 10 minutos delantre de programadores. Dempués hai una sesión de networking pa evaluar si trabayen xuntos nun futuru o los programen.
.
Suscríbite a les nuestres novedaes
