La cultura asturiana tien un nuevu documentu académicu que repara nella dende una perspectiva económica, social y cultural. El Trabayu Fin de Máster Análisis y oportunidades para el desarrollo de las Industrias Culturales y Creativas en Asturies realizáu por Xicu Ariza, director de MUSICASTURIANA.COM, percuerre a lo llargo de 96 páxines delles cuestiones pa comprender el potencial de desarrollu que tienen les ICC a lo llargo de tol mundu y la repercusión d’esti sector n’Asturies. Amás, establez comparatives con otres comunidaes autónomes de la redolada como Navarra y Galicia.
L’estudiu ye’l trabayu final de la titulación Máster Universitario en Dirección y Gestión de las Industrias Culturales y Creativas, cursáu por Ariza na Universidad Europea Miguel de Cervantes (UEMC) con una ayuda de la Conseyería de Cultura, Política Llingüística y Deporte. Ta tutorizáu por Cristina Ortega Neure, doctora n’Ocio y Desarrollo Humano y collaboradora con instituciones internacionales y llocales nel desendolcu y evaluación de polítiques culturales. Ente elles destaca’l so llabor dientro del Consejo Vasco de Cultura del gobiernu vascu y del Observatorio Vasco de la Cultura.
En cuantes al conteníu esti parte de la evidencia que les ICC «ye ún de los sectores económicos más nuevos y de más rápido crecimientu nel mundu». Asina lo amuesen los datos de la UNESCO que reflexen qu’en 2021 esti sector aportó’l 3,1% del PIB mundial y el 6,2% del empléu total; unes cifres que dupliquen a les de 2005 y que nun aparen de medrar. D’esta miente el TFM entama definiendo conceptos básicos rellacionaos colos derechos culturales, cola creatividá, la economía cultural y creativa y les polítiques culturales; pa llueu repasar los principales documentos rectores sobre la materia y reparar nes cifres d’emplegu y facturación de les ICC nel mundu, Europa y l’Estáu español. Nesti últimu apartáu destaca que les ICC tán medrando más rápidamente nes economíes en víes de desarrollu, contribuyendo fondamente al desendolque d’esos territorios.
La mirada asturiana
Tres d’esta contestualización global, el trabayu céntrase n’Asturies. Primero fai un repasu de les lleis culturales, de los organismos pùblicos que xestionen la cultura, del sector cultural asturianu -qu’en 2019 tuvo una facturación de 229,8 millones-, de los sos subsectores, de les organizaciones, de les actividaes y equipamientos y de les audiencies. Pa llueu observar les principales polítiques públiques, sobre manera dende’l 2019 que foi cuando’l gobiernu asturianu entamó a da-y más puxu a esta cuestión. Nesta parte d’análisis, l’estudiu tamién repara nestes cuestiones analizando dos territorios: Navarra y Galicia. El primeru, por ser uniprovincial, tener un presupuestu asemeyáu al d’Asturies y un gobiernu progresista; el segundu, pola cercanía xeográfica y cultural y por tar históricamente gobernáu pol PPdeG.
Ente les conclusiones, el TFM sorraya que, en comparación con otros territorios, n’Asturies los responsables políticos, económicos y académicos nun-y dieron una prioridá a la cultura como un elementu de desarrollu cultural. Asina ye como les polítiques culturales son tardíes y respuenden a la «aproximación ocurrencial» más que a una estratexa definida. Amás, l’estudiu recalca que «la combinación de polítiques culturales y inversión presupuestaria tradúzse nel impactu económicu de les ICC en cada territoriu; en Galicia, el sector cultural supone un 3% del PIB y 3,6% del empléu total) y en Navarra facturó 250 millones de euros xeneró’l 3,9% del empléu total; mientras que n’Asturies la facturación foi de 229,8 millones y creó’l 2,8% del empléu total». Acordies a esto, el trabayu pon d’exemplu la «comparativa sangrante» de que’l retornu n’ayudes al sector navarru en comparación a les sos cifres de facturación foi de 3,69 millones (0,014%) mientres que n’Asturies foi de 1,13 millones (0,0049%).
«Con un sofitu públicu mayor y meyores polítiques ye probable que les ICC d’Asturies algamaren mayores cuotes de facturación y de xeneración d’empléu, pudiendo asina superar la cifra de xeneración del 3,5% del empléu total p’averase a los datos de Navarra y Galicia», ye otra de les conclusiones d’esta investigación académica que reivindica la oportunidá y la necesidá d’apostar poles ICC n’Asturies tamién dende una perspectiva de futuru, por mor de qu’estes industries empleen sobre manera a población mozo. Pa finar, el TFM fai una serie de propuestes de qué podría facese pa qu’esti sector espoxigue nel país.
Suscríbite a les nuestres novedaes
