La selmana pasada el gobiernu d’Asturies publicó l’anteproyectu de la Llei de Mecenalgu, impulsáu pola Conseyería de Facienda, Xusticia y Asuntos Europeos, y qu’entama asina la so fase d’información pública. La norma busca favorecer la participación del sector priváu n’actividaes de distintu calter: culturales, deportives, sanitaries d’asistencia social, d’investigación científica, de desendolque y innovación tecnolóxica, de promoción d’igualdá ente homes y muyeres y de cualquier otra estaya considerada d’interés xeneral.
El testu establez un conxuntu d’incentivos fiscales pa estimular la collaboración social y prevé que’l mecenalgu pueda materializase a traviés de delles modalidaes: donativos y donaciones dineraries, de bienes o de derechos; cesiones d’usu o contratos de comodato de calter gratuitu; convenios de collaboración empresarial n’actividaes d’interés xeneral; y constitución de nueves fundaciones o aportaciones al patrimoniu fundacional d’entidaes yá esistentes.
En materia tributaria, l’anteproyectu distingue trés grandes bloques d’incentivos. Per un llau, pa les persones físiques qu’actúen como mecenes afítase un réxime específicu de deducciones nel IRPF. Pel otru, pa les persones xurídiques, el testu introduz como principal novedá la creación de creitos fiscales aplicables a los impuestos y tases propios de la comunidá. Estos creitos alcanzarán el 25% del importe total del donativu, con una llende anual de 5.000 euros, y van poder usase nun periodu de cuatro años dende’l so reconocimientu.
Por último, l’anteproyectu recueye beneficios fiscales nel Impuestu sobre Sucesiones y Donaciones y nel Impuestu sobre Tresmisiones Patrimoniales pa que les operaciones venceyaes al mecenalgu queden exentes de tributación y nun soporten cargues adicionales.
Cola posible aprobación d’esta Llei, Asturies cuntará con una norma propia nesta cuestión, sumándose a la llexislación estatal que yá contempla dellos incentivos fiscales pa les figures xurídiques que faigan inversión na producción d’espectáculos en vivo, ente los que s’inclúin producciones de conciertos y festivales de música.
Suscríbite a les nuestres novedaes
