Imaxina que produces un conciertu en catalán en Barcelona o unu n’asturianu nun festival de prau. Agora imaxina esi mesmu conciertu, colos mesmos costes de producción, idénticu númberu d’espectadores potenciales y el mesmu valor cultural, pero treslladáu a Bilbao y cantáu n’euskera. Sobre’l papel, la realidá debería ser la mesma. Mientres esti últimu tien accesu a deducciones fiscales específiques pol fechu d’esistir n’euskera, los dos primeros, cenciellamente, nun esisten pa l’Axencia Tributaria.
Y ye sorprendente porque la nuestra Constitución nel so artículu 3 protexe toles llingües españoles reconociéndoles como patrimoniu cultural d’especial respetu y protección, cola obligación de los poderes públicos de protexer y promover el so usu.
«Les trés diputaciones forales vasques construyeron el modelu más avanzáu en cuantes a incentivos pa la música. Y nun lo ye namás pola cuantía de les deducciones, tamién porque reconocen el valor del euskera como un activo que merez una compensación fiscal»
Esta ye la paradoxa qu’afuega a la industria de la música en vivo n’España. El mapa de los incentivos fiscales non namás dibuxa númberos; reflexa desigualdaes que son polítiques, culturales y, sobre manera, profundamente inxustes. Nun Estáu plural, la diversidá llingüística paez ser un lluxu que namás dalgunos territorios pueden permitise protexer.
Les trés diputaciones forales vasques —Bizkaia, Araba y Gipuzkoa— construyeron el modelu más avanzáu del Estáu en cuantes a incentivos pa la música. Y nun lo ficieron namás pola cuantía de les deducciones, sinón por dalgo muncho más determinante: reconocen el valor del euskera como un activo que merez una compensación fiscal.
La normativa foral ye clara. En Bizakia, l’artículu 66 quater afita incentivos pal fomentu de la cultura qu’incluyen bonificaciones adicionales si los espectáculos son dafechu o parcialmente n’euskera. Gipuzkoa replica esti espíritu nel so artículu 66 bis, y Araba fai lo propio col 66 ter. El mensaxe qu’unvíen ye potente y ye que la llingua propia nun ye namás folclore, forma parte de la política fiscal estratéxica.
«El sistema vascu entendió que la cultura nun pue depender namás del promotor y distingue la figura del inversor. Asina permítese que’l capital priváu entre na cultura con seguridá xurídica y beneficios claros»
Pero hai más: el sistema vascu entendió que la cultura nun pue depender namás del promotor. Por eso, distingue ente quien produz l’espectáculu y quien lu financia: l’inversor. Figures como l’artículu 66 quinquies en Bizkaia, el 66 ter en Gipuzkoa o’l 66 quater n’Araba permiten que’l capital priváu entre na cultura con seguridá xurídica y beneficios claros. Ye un doble carril de financiación que n’Asturies, Galicia, Cataluña, Baleares, Comunidá Valenciana… suena a utopía.
Si cruciamos la llende hacia Navarra, el panorama tórnase desconcertante. Pesie a compartir l’euskera como llingua cooficial nel so territoriu, la so normativa fiscal paez escaecer el so patrimoniu propiu. L’artículu 65 ter de la llei foral afita deducciones pal promotor, pero nin menciona criterios llingüísticos nin contempla la figura del inversor. Pa la Facienda Navarra, en Pamplona da igual cantar n’euskera que n’inglés; la ventaxa ye la mesma: nenguna.
«En Navarra da igual cantar n’euskera que n’inglés y pal Estáu les llingües propies son invisibles nel Impuestu de Sociedaes y na declaración de la Renta»
Y si Navarra decepciona, el territoriu común directamente abandona l’usu de les otres llingües peninsulares a la suerte de los sos creadores. La Llei del Impuestu sobre Sociedaes (LIS) contempla deducciones a la producción d’espectáculos en vivo nos sos artículos 36.3 y 39.7 (inversión), pero nun hai nenguna referencia a la realidá plurillingüísitca del nuestru territoriu. Pal Estáu, les llingües propies son invisibles nel Impuestu de Sociedaes y na declaración de la Renta. El resultáu ye un mercáu implacable qu’emburria a los grupos a cantar en castellanu pa sobrevivir, non por falta de talentu, sinón por ausencia de polítiques que los apoyen.
Podríemos pensar que’l mecenalgu ye la tabla de salvación, pero la realidá ye que la Llei 49/2002 ta diseñada pal sieglu pasáu y pa les grandes instituciones. Un grupu de música asturiana o un festival comarcal nun son fundaciones millonaries; son profesionales que necesiten viabilidá, non caridá. El sistema actual premia la escala y les estructures alministratives fuertes, dexando fuera a la música de proximidá.
«El recién anteproyectu de la Llei de Mecenalgu n’Asturies ye un primer pasu pero quedará curtiu. Asturies tenía la oportunidá de protexer l’asturianu dende l’arquitectura tributaria, pero optóse por un modelu xenéricu que nun reconoz la urxencia d’apoyar proyectos n’asturianu»
Nesti contestu, el recién anteproyectu de la Llei de Mecenalgu n’Asturies (febreru de 2026) ye un primer pasu pero quedará curtiu. Anque introduz deducciones nel IRPF y creitos fiscales del 25% pa les empreses, llega tarde y col mesmu error de base: nun contempla criterios llingüísticos específicos. Asturies tenía la oportunidá de lliderar un cambiu de paradigma y protexer l’asturianu dende l’arquitectura tributaria, pero optóse por un modelu xenéricu que nun reconoz la urxencia d’apoyar proyectos n’asturianu, que s’alcuentra nuna situación crítica de supervivencia.
Como bien se señaló n’estremaos análisis al rodiu la “macrofesticulitis”, davezu los recursos públicos acaben n’eventos masivos y rentables que yá son autosuficientes, mientres se dexa morrer a les iniciatives pequeñes que garanticen l’accesu a la cultura nel territoriu. Un festival n’asturianu en Degaña tien más impactu social qu’un macroeventu urbanu, pero fiscalmente l’apoyu ye incomparable.
«Un festival n’asturianu en Degaña tien más impactu social qu’un macroeventu urbanu, pero fiscalmente l’apoyu ye incomparable»
En 2001, España declaró’l so compromisu cola cooficialidá de les llamaes llingües rexonales o minoritaries. Fízolo a traviés de la ratificación de la Carta Europea de las Llingües Rexonales o Minoritaries. Una midida que complementaba al Artículu 3 de la Constitución Española, que reconoz la cooficialidá d’otres llingües españoles nes sos respectives Comunidaes Autónomes.
Na práctica, pocos cambios.
«La diversidá cultural nun ye un lluxu folclóricu; ye un derechu que merez protección nacional y autonómica. Protexelu pasa por midíes valientes na armonización foral, reforma de la LIS y el mecenalgu de proximidá. El modelu vascu amesa que ye posible»
El camín pa garantizar la xusticia cultural, la cohesión social y evitar la estinción de la nuestra diversidá musical pasa por midíes valientes:
El modelu vascu amuesa que ye posible. La diversidá cultural nun ye un lluxu folclóricu; ye un derechu que merez protección nacional y autonómica. ¿Queremos realmente un país culturalmente plural? La respuesta ta en desendolcar polítiques fiscales eficientes y destinaes a ello.
Pilar Aguilar. Business Project Manager n’Incentiva Cultura
Doctora pola UCM con más de 15 años d’esperiencia na dirección de proyectos culturales n’instituciones públiques y privaes, especializada en financiación na industria musical (deducciones, subvenciones y ayudes públiques). Profesora Doctora y Tribunal de Grau na UOC. Nacida en Valencia y residente en Donostia, firme defensora de les llingües cooficiales como’l patrimoniu inmaterial de mayor valor, riqueza y diversidá de los nuestros territorios.
Suscríbite a les nuestres novedaes
