Dempués d’asoleyar el so primer EP n’asturianu Páxaros 01, Ferla Megía entama a esparder un formatu físicu del álbum qu’inclúi un compangu de temes, mezcles y versiones inédites. A los seis temes nos que fusiona xéneros y influyencies dende’l dembow, hip hop y trap hasta’l folk, trip hop, ambient y electrónica, se-yos sumen ‘mar de ñubes‘, dos mezcles nueves de ‘tou’ y ‘pérame’, la versión instrumental de ‘xatu’ y l’acústica de ‘medrana a medrar’. Esti trabayu artesanal fechu pol artista va poder mercase nel so bandcamp, nos sos conciertos y na tienda online de musicasturiana.com, onde namás va haber 10 unidaes disponibles.
El camín de Ferla Megía ye’l d’un artista n’evolución. En 2020, decidió que’l so proyectu anterior nun espeyaba la so visión musical. Entamó a esplorar un enfoque más intimista y, nesi mesmu añu, presentó’l so tema «Algún día». En 2021 llanzó’l so primer EP, Fruto de la memoria, con un estilu más cercanu al R&B. Tres d’estos trabayos, dedicóse a afondar na música de raigañu y a reconeutar coles sos influyencies tradicionales. En 2023 retomó’l so proyectu asoleyando dellos singles de manera independiente, a la gueta de nueves sonoridades y calteniendo la fidelidá a los sos raigaños; dos aspeutos reflexaos en Páxaros 01.
Suscríbite a les nuestres novedaes
