MUSICASTURIANA.COM entama una nueva estaya dedicada a la industria musical y tamién a la so xestión dende les polítiques públiques. Entrevistes, artículos, noticies, testos formativos… son dalgunos de los conteníos que van dar forma a Industria y Política Musical. Esta sección nueva estrénase con una entrevista a Fernando Garayoa, responsable de Navarra Music Commision, entidá pública que desendolca iniciatives bien interesantes pa puxar pol sector musical de Navarra. La charra tuvo llugar nel BIME Pro 2024 y ye la primer d’una serie d’entrevistes na que tamién se conversó colos responsables del Instituto de las Industrias Culturales y las Artes de Murcia y de Musika Bulegoa del País Vascu.
¿Qué ye Navarra Music Commission?
Navarra Music Commission ye una oficina pública que trabaya pa puxar pola industria musical de Navarra. Tenemos tres años de vida y trabayamos principalmente con tres llinies de proyectos: l’asesoramientu, la formación y la promoción.
L’asesoramientu foi lo que fizo que naciera la oficina porque decatámonos de que los grupos nun teníen una especie de ventanina pa poder dir a cuntar los sos problemes, proyectos, necesidaes, etc. Esta llinia d’asesoramientu ta funcionando perbién. Pa que te faigas una idea, llegamos a 187 cites d’asesoramientu esti añu.
Per otru llau tenemos un programa de formación que se llama Navarra Music Pro. Nél lo que facemos ye que, neses cites d’asesoramientu, los músicos y les músiques treslládennos los sos problemes y, con esa información, intentamos da-yos soluciones. Esi programa desendólcase en tres meses, pero l’añu viniente vamos cambialu y va desendolcase tol añu. Ye una formación que nun se da davezu nos conservatorios; ye más práctica. Desplíquense estratexes de marketing, cómo y quién xube los sos cantares a internet, cuestiones llegales, fiscales, estratexa 360, etc.
Per último, la tercer parte, la de la promoción, ye quiciabes la que más espoxigó. Trabayamos principalmente n’algamar alcuerdos con dellos festivales, feries y mercaos, pa que los artistes de Navarra puedan salir fuera a tocar.
«Tenemos tres años de vida y trabayamos principalmente con tres llinies de proyectos: l’asesoramientu, la formación y la promoción»
Tamién tenéis tres programes de circuitos musicales, ¿non?
Sí. Como tol mundu sabe, dende la pandemia’l circuitu de sales y de barrios onde se toca en directo sofrió muncho. Navarra ye una tierra na que prácticamente nun sabemos facer nada ensin música. Teníemos un circuitu underground perimportante, unos 25 conciertos a la selmana namás n’Iruñerria -zona metropolitana d’Iruña-. Esi circuitu viose mui afectáu y cayó en munchos llocales. Lo que tamos tentando facer coles nuestres posibilidaes ye incidir en qu’esa base nun se pierda, porque ensin esa base nun habrá conciertos nin artistes en sales y n’espacios grandes. Tamos, entós, intentando texer redes de collaboración, non namás coles sales, sinón tamién colos llocales pequeños que faen conciertos.
Tenemos tres programes. Unu llámase «Girando por Navarra«, mui asemeyáu a «Girando por Salas» y destináu a los grupos emerxentes, abriendo muncho l’abanicu de grupos y espardiéndolu per tol territoriu. Esto ye perimportante pa nós, porque en comunidaes uniprovinciales céntrase casi too na capital, y Navarra o Asturies nun son namás la capital. Entós, repartimos los 25 o 26 conciertos en llocalidaes de toa Navarra y págase a los grupos un caché que nun cobren davezu -que pa un grupu emerxente pue salva-yos mediu añu de llocales d’ensayu, por exemplu-. Anque nun paezan munches perres, si ties un conciertu cobres 2.500 euros y si ties dos, 4.000 euros. Siempre son les llocalidaes les qu’escueyen a los grupos, non nós.
La segunda iniciativa que llanzamos llámase Kuxkuxean y lo que facemos ye tentar llegar a alcuerdos con sales un poco más grandes, pero que tengan un segundu espaciu con aforos de 100 a 150, onde los grupos emerxentes pueden entamar a presentar los sos conciertos. Comprámos-yos les feches y sacamos una convocatoria -al ser una oficina pública siempre funcionamos con convocatories abiertes-. Los grupos escoyíos tienen una fecha pa tocar ensin esmolecese pol alquiler. Lo único que tienen que decidir ye si’l conciertu ye con entrada, de baldre o con taquilla inversa.
La tercer propuesta -que yá arrancáremos nel Ayuntamientu d’Iruña- llámase «Salas de Música en la Calle» y trátase de facer dalgo pa sofitar a eses sales o llocales que programen música en directo ensin ayuda durante tol añu. Trabayamos conxuntamente dambes instituciones -nós y l’ayuntamientu-. Facémonos cargu de los cachés de los grupos y de la producción de los conciertos. Amás, damos una ayuda de 200 euros p’agospiar a los artistes a cada llocal o sala, que tamién pueden poner la barra nesos conciertos.
Esi ye’l resumen de les tres propuestes y el balance foi perbonu. Hai que tener en cuenta qu’en Navarra somos 600.000 habitantes, pero nel nuestru atles de la música tenemos 629 bandes n’activu inscrites.
«Repartimos los 25 o 26 conciertos en llocalidaes de toa Navarra y págase a los grupos un caché que nun cobren davezu»
Volviendo al entamu ¿Cuándo, cómo y por qué naz Navarra Music Commission?
En 2021. El por qué ye mui cenciello: detectamos qu’había una necesidá y tábemos convencíos d’ello. Una necesidá -non solo de los músicos y les músiques, tamién de tola parte de la industria musical- de tener una ventana única a la que poder averase non namás pa cuntar los sos problemes, sinón tamién los sos proyectos y les sos necesidaes.
¿Cómo foi’l procesu de creación?
Presentóse la idea, el gobiernu violo bien, convocóse una plaza pública -que tuve la suerte de sacar- y dende ehí entamamos a trabayar. Yera importante pa nós dende l’entamu que fuere una oficina pública, porque eso permítenos trabayar pa toos y toes por igual, ensin debenos a naide. Esta oficina pertenez a una empresa pública que se llama NICDO (Navarra Impulsa Cultura, Deporte y Ocio), que xestiona les principales infraestructures culturales de Navarra: l’auditoriu de Baluarte, el Navarra Arena, el Planetario, etc.
«Si tuviéremos integraos na estructura del gobiernu sedría una llocura porque nun habría axilidá de trabayu. Formar parte d’una empresa pública permite una axilidá, una facilidá y una maniobra de trabayu muncho más importante»
¿Y qué ventaxes y inconvenientes tien formar parte d’otra entidá pública?
Hai que tener en cuenta que si tuviéremos integraos na estructura del gobiernu sedría una llocura porque nun habría axilidá de trabayu. Pa sacar una convocatoria -si tuviere integráu nun departamentu del gobiernu- sedría un procesu d’un añu. Formar parte d’una empresa pública permite una axilidá, una facilidá y una maniobra de trabayu muncho más importante.
¿Qué papel xuega la música n’euskera y la normalización llingüística dientro de Navarra Music Commission?
Trabayamos pa toles músiques. Siempre qu’asoleyamos una convocatoria ponemos enfotu en dos puntos que son importantes pa nós: dase-y prioridá a les bandes qu’empleguen l’euskera, porque ye’l nuestru idioma; y tamién a les bandes qu’incorporen muyeres.
«Ponemos enfotu en dos puntos que son importantes pa nós: dase-y prioridá a les bandes qu’empleguen l’euskera, porque ye’l nuestru idioma; y tamién a les bandes qu’incorporen muyeres»
Tamos faciendo esta entrevista nel BIME. ¿Cuála ye la vuestra participación en feries de la industria musical como esta?
Tentamos llegar a alcuerdos coles principales feries. Tenemos alcuerdu col Mercat de la Música de Vic y cola Fira Mediterránea de Manresa -que lo xestiona Catalan Arts-; con Fira Trovam de Castelló -que lo xestiona la Valencia Music Office-, etc. Esa ye la filosofía.
«El presupuestu pa desendolcar too esto en 2024 foi de 250.000 euros»
Nestos eventos promocionáis, amás, a unes bandes en concreto.
El procesu ye más menos asemeyáu pa cuasi toles entidaes. Si, por exemplu, llegamos a un alcuerdu con BIME -que nel nuestru casu ye un alcuerdu económicu-, publicamos una convocatoria abierta; los artistes preséntense; tresllándense a BIME les propuestes y BIME ye quien escueye a los artistes que toquen.
Yá pa rematar, ¿cuál ye’l presupuestu de Navarra Music Commision pa desendolcar tolo que facéis?
En 2024 tuvimos un presupuestu de 250.000 euros.
.
Suscríbite a les nuestres novedaes
