Muyeres reestrenen ‘Humanes’ el 7 de xineru nel Centru Niemeyer d’Avilés

El 14 de marzu de 2020 Muyeres diben presentar l’espectáculu ‘Humanes‘ nel Nuevu Teatru de La Felguera. Esi mesmu día, entamó l’estáu d’alarma y el confinamientu domiciliariu por cuenta de la crisis sanitaria del COVID-19. Dos años depués, l’agrupación de música tradicional pue volver a los escenarios pa reestrenar esti cuidáu espectáculu qu’acompaña al so sestu discu. Va ser el próximu 7 de xineru, a les 20.30h, nel Centru Niemeyer d’Avilés y les entraes yá tán a la venta por venti euros.

Muyeres ye ún de los nomes más importantes del folclor asturianu. Esti colectivu nació en 1993 cola unión de muyeres procedentes de dalgunos de los grupos d’investigación etnográfica más destacaos. L’oxetivu que teníen yera’l de reivindicar la música de percusión del país y el protagonismu de la muyer nel caltenimientu de la tradición sonora asturiana. Cuasi 30 años depués, con seis discos publicaos y con una montonera d’espectáculos entamaos; siguen siendo una pieza fundamental de la cultura asturiana.

‘Humanes’ ye’l so últimu discu y un trabayu históricu na so trayectoria porque, per primer vez, nun compilen cantares tradicionales, sinón quaxunten 13 canciones de composición propia. Les lletres homenaxeen a les humanes; a eses muyeres anónimes que fueron faciendo historia. La música ye ellaborada, con muncha calidá y esplora distintos soníos dientro del folk asturianu. L’espectáculu, estrenáu nel Teatru La Llaboral de Xixón en xineru 2020, amosó’l bon facer y la innovación de la formación; daqué que se caltién intacto con vistes al so próximu reestrenu nel Niemeyer.

Comprar discos de Muyeres na tienda online