Muyeres y Maramoniz toquen nel ciclu Encaja2 del Teatru Xovellanos
La música n’asturianu vuelve a aportar a Encaja2, el ciclu de conciertos en formatu íntimu qu’organiza’l Teatru Xovellanos de Xixón. El 12 d’abril van actuar Muyeres y el 7 de xunu Maramoniz, el proyectu nuevu de jazz de raigañu capitaneáu por Mapi Quintana y César Latorre. Les entraes pa ver estes actuaciones en formatu únicu yá tán a la venta por 5 euros, anque les de Muyeres yá tán escosaes.
Encaja2 nació en 2020 p’adaptar les actuaciones musicales del Xovellanos a les restricciones sanitaries por mor del Coronavirus. La caxa escénica del míticu teatru xixonés ye l’espaciu nel que grupos de dellos estilos interpreten una actuación de 40 minutos con un aforu de públicu mui reducíu, dando llugar a una esperiencia única que llueu s’emite per YouTube. Pel so escenariu yá pasaron les propuestes de música n’asturianu de L-R, Rodrigo Cuevas, Xaime Martínez y Antón Menchaca; y nesta séptima temporada la nuestra llingua vuelve a sonar gracies a los conciertos de Muyeres y Maramoniz.
