N’Arba, Felpeyu, La Bandina’l Tombo, la Garrapiella y cuatro bandes de gaites el sábadu 7 en Llanera
El sábadu 7 de mayu la música de raigañu tien una cita en Llugo (Llanera). La cultura asturiana va enllenar la llocalidá gracies al III Alcuentru de Bandes de Gaites de Llanera nel que van participar les bandes de gaites Fonte Fuécara, La Madreña, La Laguna del Torollu, Teixo – Manolo Quirós, y la bandina La Garrapiella. La músiva en vivo sigue pela nueche col Conciertu Les Lletres nel qu’actúen nel Aparcaderu de La Casa Cultura de Pondal La Bandina’l Tombo, Felpeyu y N’Arba.
D’esti Conciertu Les Lletres destaquen les actuaciones de grupos a los que nos últimos años ye difícil velos en directo. N’Arba -banda de cultu del folk asturianu formada en 1997 por Xosé Ambás- suel dar namás da un conciertu al añu y La Bandina’l Tombo -cuartetu de música tradicional pal baille qu’interpreta pieces del fin del sieglu XIX y primeros del XX- tien la so actividá nun segundu planu por mor de que los sos componentes toquen n’otra montonera de proyectos musicales. Sicasí, Marga Lorences, curdión d’esta última formación, esclaria a Musicasturiana.com que’l grupu «nunca dexó de tar n’activo» y que tienen intención de «grabar otru discu del que yá hai dellos temes arreglaos».
Les dos actividaes son de baldre, l’alcuentru de bandes de gaites va ser ente les 18h y les 20.30h y los horarios d’actuaciones del conciertu son La Bandina’l Tombo a les 21h, Felpeyu a les 22.30h y N’Arba a la medianueche.
