XVIII Mercáu Quirosán con canción asturiana, bandes de gaites, Los Gascones y Les Pandereteres de Fitoria
El Mercáu Quirosán de Bárzana aporta a la so decimoctava edición esti fin de selmana. Amás del mercáu y de delles actividaes y talleres pa tola familia, la música y la cultura tradicional protagonicen l’eventu. El Festival de la Canción Asturiana, el V Alcuentru de Bandes Gaites y los conciertos de Los Gascones y les Pandereteres de Fitoria dan forma a les actuaciones del sábadu 30 y domingu 1 de mayu.
El sábadu 30 a les 12.30 va cellebrase’l Festival de Canción Asturiana presentáu por Anabel Santiago y nél actúen Juan Manuel Fernández, Elvira Fernández, Néstor Díaz y el gaiteru Luis Álvarez Pola. A les 17.30h delles agrupaciones folclóriques van desfilar peles cais de Bárzana enantes de qu’arranque, a les 19h, el V Alcuentru de Bandes de Gaites nel qu’actúen les bandes Picos d’Europa Cabrales DOP (Cabrales), La Reina del Truébano (Navia), Villa de Xixón y Teixo Manolo Quirós (Quirós).
El domingu 1 de mayu la bandina popular Los Gascones van amenizar la sesión vermú a les 13h y a les 17h la formación de música tradicional Les Pandereteres de Fitoria va poner el ramu a esti XVIII Mercáu Quirosán a les 17 hores. Durante tol fin de selmana tamién va tar abiertu’l Muséu Etnográficu de Quirós.
