Yá ta na cai ‘La Casa Vieya’, tercer EP del grupu jazz Slum Suit
Yá ta a la venta na tienda online y en toles plataformes dixitales ‘La Casa Vieya‘, el tercer EP del grupu de jazz de raigañu Slum Suit. Tres llanzar en 2017 -cuando la formación tovía taba asitiada en Nueva York- el trabayu homónimu ‘Slum Suit‘ y en 2019 ‘Ida y Vuelta‘ -col que tuvieron nominaciones nel Premiu Camaretá al Meyor Cantar y nos Premios AMAS-; en 2020 la banda reconvirtióse nun cuartetu más averáu al jazz. Agora llancen 6 temes nos qu’entemecen nueves composiciones cola adaptación jazzera del cancioneru popular asturianu.
«Nos anteriores trabayos construíamos too sobre melodíes orixinales. Nesti decidimos garrar melodíes populares y montar tolo que nos apetecía sobre elles. Garramos cantares perconocíos y otros que quedaron un pocu más escaecíos» , comenta’l gaiteru y saxofonista Carlos Casado, cabezaleru de Slum Suit, sobre esta grabación. Al empar, matiza que de los cantares más conocíos nun quieren «facer una competición de cuál ye la meyor versión», sinón reflexar «lo interesante de ver como cada persona o banta tien diferentes idees sobre la mesma “materia prima”».
D’esta manera, ‘La Casa Vieya’ ta formáu por cinco arreglos de Slum Suit y una versión d’un tema asturianu de Pedro Iturralde, reputáu músicu jazz al que tán homenaxeando col espectáculu ‘Siguiendo’l Camín d’Iturralde‘. Nesta grabación, la formación ta renovada y d’ella formen parte xente veterano de la escena jazz: Xaime Arias al pianu, Eva D. Toca a la batería, Óscar Santos al baxu, amás del propiu Casado y Aida Suárez, que collabora nun tema a la voz y el panderu. «Queriemos grabar toos xuntos a la vez, pa que fuera lo más paecío a un conciertu», descata’l gaiteru y saxofonista sobre esti EP col que busquen «esperimentar col puntu de partida de la música asturiana».
Conciertos de presentación
Les próximes actuaciones que tien esta formación de jazz de raigañu son el 14 de mayu nel Muséu del Oru d’Asturies, en Navelgas (Tinéu), a les 13.00 y con entrada de baldre; y el vienres 17 de xunu na Capiya de los Dolores de Grau, a les 20h. Nestos conciertos amestaran los temes d’esti EP nuevu, xunto con otros de la so trayectoria, amás d’interpretar dellos de los que formen l’espectáculu ‘Siguiend’l Camín d’Iturralde’.
