Vuelve’l Festival de Bandes de Gaites Villa de Candás qu’aporta a la so venticinco edición con un cartelu mui completu. Dende’l xueves 21 al domingu 24 de xunetu, va haber pasacais y actuaciones de les bandes asturianes Banda Gaites Candás y Bandina d’Escolinos de la Banda Gaites Candás; la gallega Banda de Gaitas Xinzo de Limia; la berciana Banda de Gaitas Castro Bérgidum y les formaciones bretones Bagad Sonerie Bro Montroulez y Arvorig Breizh Band. La programación va completase colos conciertos de Felpeyu. N’Arba y l’espectáculu Tradicionando.
El xueves 21 a les 19.15h arranca esta Fiesta d’Interés Turísticu Rexonal col pasacais y conciertu de la Banda Gaites Candás que va dar entamu tamién al Mercáu Tradicional allugáu na Plaza Hermanos Helio. Al día siguiente, el vienres 22, los pasacais y actuaciones entamen dende’l mediudía cola Bandina d’Escolinos de la Banda Gaites de Candás (13h); el quintentu Arvorig Breizh Band (13.30h); y la Bagad Sonerie Bro Montroulez (19h). El platu fuerte aporta a les 23h, col desfile y conciertu en la Plaza La Baragaña de toles bandes participantes nesta 25 edición del festival y llueu, a la medianueche, conciertu del míticu grupu folk N’Arba nesi mesmu espaciu.
El sábadu 23 ye’l día más completu de tol festival. A les 13h y a les 19h ye’l pasacais y actuación de la Banda de Gaitas Castro Bérgidum; a les 13.15h y a les 20h de la Banda de Gaitas Xinzo de Limia; y a les 19h de la Bagad Sonerie Bro Montroulez. Llueu, a les 22.30h toles bandes van desfilar hasta la Plaza Les Conserveres onde van tocar a les 23h pa llueu dir a les 00:45h hasta la Plaza la Baragaña. El ramu d’esi día pónenlo Felpeyu, qu’actúen nel escenariu de La Baragaña a la 1 la nueche.
Por último’l XXV Festival Banda de Gaites Villa de Candás remata’l domingu col VII Concursu de Percusión Villa de Candás -a les 13.30h en La Baragaña- y el VII Concursu de Pareyes de Gaita y Tambor «Memorial Diego Alonso» -a les 18h tamién en La Baragaña-. Esta céntrica plaza candasina acueye a les 20.30h l’actuación del espectáculu Tradicionando, qu’axunta música, baille y cantares tradicionales nun mesmu escenariu, y col que fina esta completa edición que convierte a Candás na capital de la gaita esti fin de selmana.
Suscríbite a les nuestres novedaes
