«La Buelga ye’l resultáu del interés cada vez mayor qu’hai pola música y la cultura asturiana fuera d’Asturies»

Ente’l 11 y el 15 de xunetu los músicos Leticia Baselgas y Rubén Bada (L-R, Calea…) van tar n’Irlanda participando nel proyectu La Buelga, una residencia artística entamada pol guitarrista irlandés Ewan Cowley, financiada pol Arts Council -l’axencia del gobiernu irlandés pal desendolcu de la cultura nesi país- y que va rematar con dos conciertos conxuntos ente músicos irlandeses y asturianos en Dublín y en Westford. Una esperiencia que pa Rubén Bada «ye’l resultáu del interés cada vez mayor qu’hai pola música y la cultura asturiana fuera d’Asturies».

«Va dos años Ewan Cowley quixo deprender música asturiana y, como-y sonaba’l mio nome, púnxose en contacto conmigo. Pidió una subvención a Arts Council de la República d’Irlanda pa costease les clases y tuvi seis meses aproximadamente enseñándo-y música asturiana, falándo-y de los estilos qu’hai, del baille asturianu, de la tonada, de cantar y tocar pal baille, de la llingua y historia d’Asturies… La cosa cuayó, Cowley pidió una segunda subvención a Arts Council pa facer un intercambiu de músicos irlandeses y asturianos; axuntóse col gaiteru Mark Redmond y el percusionista Andy Reilly, d’Asturies quixo cuntar conmigo pa la parte más instrumental y con Leticia Baselgas pa tener una representación de lo que ye la pandereta asturiana; y agora tamos trabayando tola selmana pa llueu dar los conciertos». D’esta manera resume Bada en qué consiste esta residencia artística que-yos «da la oportunidá de tar n’Irlanda, de conocer músicos nuevos, d’esperimentar cola música asturiana y con otres músiques y cultures y de deprender ente toos de la bayura musical qu’hai nesta parte del mundu».

Musicalmente, Bada muéstrase intrigáu por ver cómo ye la unión de les dos cultures musicales: «podemos falar d’interceltismu o de música celta, pero en realidá lo qu’existe ye la música irlandesa y la música asturiana, que son dos llinguaxes paecíos en cierta midía, pero con personalidaes mui fuertes caduna y qu’hai que ver si la cosa casa bien». Pela so parte tovía nun saben si van actuar «col formatu L-R o con dalgo más acústicu», pero lo que sí que tien claro ye la ilusión por «esperimentar coles dos sonoridaes», amás de facer que «seguramente per primer vez una pandereta asturiana toque xunto a uillean pipes».

Inversión de la República d’Irlanda

«El gobiernu irlandés a traviés d’Arts Council invirtió bastantes perres en que La Buelga saliera alantre y estos intercambios ente músicos del Arcu Atlánticu funcionen. Igual deberíen d’empezar a potenciar esto dende Asturies nes sos polítiques de promoción de la llingua y cultura asturiana, porque ye dalgo que ta xenerando interés y que si lo sabemos aprovechar, pue colocanos nel mapa. Si siguimos enzarraos en nós mesmos a nivel institucional, la cosa poco va avanzar», valora’l veteranu músicu a mou de conclusión sobre’l papel que tienen esperiencies d’intercambios artísticos.

Amás, Bada sorraya l’interés que xenera la música asturiana cuando se conoz y pon d’exemplu’l so pasu esti fin de selmana pel prestixosu BBK Live: «lo malo foi qu’abrimos el festival, polo que tas tocando pa la xente que ta entrando al recintu. Sicasí, a los venti minutos d’entamar el conciertu teníemos ellí montada una danza porque la xente que sabía baillar garró a quienestaben per ellí y punxéronse a baillar. Amás, si hubo xente que quedó tol conciertu en primer fila mirando pa nós, creo que ye que sorprendimos», opina’l guitarrista de L-R que valora mui positivamente tar llevando «la llingua y la cultura d’Asturies n’escenarios fuera de la so zona de confort».

Mercar CDs y vinilos de L-R