Va unos díes presentóse CreActiva Xixón, un programa creáu por AJE Asturias (Asociación de Jóvenes Empresarios) xunto con Gijón Impulsa que se define como un espaciu d’alcuentru y trabayu collaborativu pa perfiles venceyaos a la cultura y la creatividá. Música, artes escéniques, audiovisual, diseñu, o comunicación tienen cabida nesta iniciativa que busca acompañar idees y proyectos nes sos primeres fases o en procesu de desarrollu, ufriendo formación, mentoríes y conexones dientro del ecosistema cultural xixonés.
El programa va desendolcase ente los meses de xineru y abril de 2026 nel Edificiu Cristasa y en Gijón Impulsa y va combinar cinco sesiones presenciales y online, como despliquen les bases de la iniciativa. Hasta un máximu de 40 persones van poder participar en CreaActiva inscribiéndose de baldre na páxina web del proyectu enantes del 31 d’avientu.
El programa entama con una xornada inicial pa la creación d’equipos multidisciplinares, a la que-y van siguir alcuentros formativos y tutoríes especializaes centraes n’estratexa, comunicación, xestión cultural y desarrollu de proyectos creativos. La convocatoria ta abierta a persones mayores de 18 años con vinculación con Xixón; tanto si cuenten con una idea propia como si prefieren sumase a proyectos yá existentes.
El procesu va rematar con un eventu final abiertu al públicu, previstu pal 23 d’abril de 2026, nel que los proyectos desendolcaos a lo llargo del programa van presentase énte axentes culturales, profesionales del sector y públicu. Con esta iniciativa, CreActiva busca reforzar el texíu creativu de la ciudá, xenerar redes ente distintos sectores culturales y ufrir nueves oportunidaes pa que proyectos venceyaos a les industries culturales alcuentren sofitu, visibilidá y proyección.
Suscríbite a les nuestres novedaes
