«Esti va ser un conciertu distintu, mui trabayáu, con collaboraciones y col estrenu d’un formatu nuevu de directu». Con estes pallabres resume Natalia González, gaitera d’Ochobre, lo que’l grupu punk-rock-folk tien preparáu pa esti sábadu 15 de payares a les 20.30h na sala Gong d’Uviéu. La cita nun va ser namás la presentación de La rabia nos dientes -el discu nuevu d’esta formación-, sinón que va ser una celebración del pasáu, presente y futuru del rock astur al cargu de la banda más moza de la escena.
Humber de Misiva, Pitxe (ex Skontra, Brutus Daughters, Cilvrnigans…) y la cantadora María Latores van xubir al escenariu con Ochobre nesti conciertu especial. Amás, va estrenase una intro que fizo’l productor JotadeJota pa los directos nuevos que’l grupu ta «estructurando» y de los qu’esta cita n’Uviéu va ser la primer amuesa. Nesa introducción ponen les sos voces Miguel Fernandi «Burilo» de Skama la Rede y Marina d’Asturxules.
Dende’l grupu punk-rock animen a la xente a dir a la sala Gong esti sábadu porque, como desplica Natalia González, «van ver un conciertu mui diferente a otros anteriores«. Acompañando a Ochobre va tar tamién Entretiempo, grupu madrilanu de ska-rock. Les entraes yá tán a la venta por un preciu de 10 euros en La Raposa (Uviéu), La Traviesa (L’Infiestu) y na web www.salagong.com.
Siete años dempués del so estrenu discográficu con Sobredosis de grisú, Ochobre llanzaron en CD y en toles plataformes musicales La rabia nos dientes. El discu ye un reflexu de la evolución granible que tuvo en tolos aspectos la banda más moza del rock astur, con nueve temes punk-rock y nos qu’hai pingarates d’otros sones como’l hardcore, celtic punk, la música tradicional asturiana, el punk melódicu, o’l metal. Too ello con unes lletres enllenes de mensaxe social, coinciencia de clase y de país.
Suscríbite a les nuestres novedaes
