Esti vienres 25 y sábadu 26 hai dos cites nel calendariu col rock n’asturianu: el festival solidariu 90 ochobres de Mieres y el V Aniversariu de La Raposa n’Uviéu. Na primera d’elles Skontra y Ochobre van llevar el so punk-folk a les Pistes Polideportives de La Peña (Mieres), mientres que na segunda va ser Skama la Rede quien ufra una descarga de ska-punk na sala Lata de Zinc. Xunto a estes formaciones de rock astur, van tocar otres bandes d’estilos punk, Oi!, swingcore y electrónica, ente otros.
Mieres en Llucha entama esti vienres el conciertu solidariu 90 Ochobres, un eventu n’alcordanza de la Revolución d’Ochobre de 1934 que va destinar los sos beneficios a les 6 de La Suiza y a la causa palestina. Amás de Skontra y Ochobre, van tocar Banda Bassoti, Kaos Urbano, Tygers of Wrath y Varillas. Les entraes pueden mercase n’entradium por un preciu de 20 € y esi mesmu día na puerta al preciu de 25 €.
Per otru llau la «Marikotaberna Vegana» La Raposa festexa’l so quintu aniversariu cuntando col rock del país una vegada más. Si l’añu pasáu foi Skontra quien participó nesta celebración, esti añu tóca-y el turnu a Skama la Rede, que van compartir escenariu coles bandes asturianes d’electrónica, swingcore y punk Fesoriazu, Guanatek, Anesteksia Soundystem, Al Cirkus B2B Mekagondios, La Morgue, Periferia y cola vallecana Cumbia Hooligan. Les entraes pa esti eventu yá tán escosaes.
Suscríbite a les nuestres novedaes
