La selmana pasada asoleyábemos una completa entrevista con Mariluz Cristóbal Caunedo. Güei rematamos l’homenaxe a la gran cantadora de tonada con Esto ye: Mariluz Cristóbal Caunedo, una llista de reproducción qu’axunta 30 cantares de la so discografía, les sos grabaciones etnográfiques con Muyeres y les collaboraciones con Rodrigo Cuevas, Hevia, Lliberdón, Carlos Rubiera y La Bedur.
Con esta publicación, continuamos la estaya de playlists nel so perfil de Spotify. Inspirándose nes This Is: que la plataforma musical sueca dedica a artistes de renome, Musicasturiana.com fai lo propio centrándose nos cantares de los grupos más destacaos de la música’l país. Esto ye: Dixebra y Esto ye: Llan de Cubel foron les anteriores incorporaciones. La escoyeta musical d’estes playlists nun respuenden namás a criterios algorítmicos o a los temes más populares de cada formación. Un exemplu d’ello son les cuasi dos hores de música que suena n’Esto ye: Mariluz Cristóbal Caunedo y qu’axunta cantares de tola so discografía, rareces, tonaes perconocíes y otres peculiaridaes del estilu de la que ye una de les grandes intérpretes d’asturianada de tolos tiempos. La playlist ye una amuesa de la so visión de la música tradicional asturiana y de cómo anovó’l xéneru xunto a los músicos que dieron forma y modernidá a les sos grabaciones.
Suscríbite a les nuestres novedaes
