«Queremos entamar un ambiente vibrante y folixeru qu’amuese los nuesos raigaños culturales»

Nel mes de marzu, David Varela daba anuncia del entamu d’un proyectu conxuntu col tamién acordionista vascu Roberto Etxebarria, una collaboración pente la que va poder esfrutase de les músiques de raigañu d’Asturies y Euskal Herria esti branu.

Roberto Etxebarria medró na música tradicional vasca y ye ún de los referentes de la trikitixa -curdión diatónicu- moderna nel so territoriu. Ye docente y músicu n’activo, con cuatro trabayos discográficos publicaos y un llibru de partitures coles sos composiciones. Formó pareya musical con Kepa Arrizabalaga hasta la so retirada en 2006, algamando la cifra de más de 100 conciertos añales dientro y fuera d’Euskal Herria. Anguaño toca cola so fía Miren Etxebarria y sigue poniendo música nes romeríes y nes cais, amás de puxar pola composición propia y l’anovación de la música folk vasca, cola mirada sollerte na tradición.

David Varela, pel so llau, tamién lleva tola vida venceyáu a la música tradicional asturiana como tamboriteru, acordionista, músicu d’acompañamientu pa grupos de pop o de teatru, profesor n’escueles de música tradicional, showman… Participó nuna bayura d’álbumes, con collaboraciones nacionales y internacionales en tolos estilos. Trabaya a comuña con diferentes compañíes teatrales y, anguaño, ta xirando per Asturies dempués d’algamar el Premiu Camaretá xunto al grupu de balfolk La Bonturné. Ye un exemplu perfectu de tresversalidá y, como Extebarria, de que lo tradicional pue amestase a la modernidá y convivir con otres artes. Falamos con él pa conocer más d’esta conexón musical ente los raigaños asturianos y los vascos col acordión diatónicu como protagonista.

¿Cuándo entama la vuestra rellación musical?

Va dellos años, tuvi la fortuna de conocer a Roberto Etxebarria –trikitilari– nuna actuación que lu traxo, xunto con Kepa Arrizabalaga –panderojole-, al Muséu del Pueblu d’Asturies en Xixón. Quedé dafechu ablucáu pol so talentu, la so música y la so entrega.

Col tiempu, Roberto contactóme pa participar en dellos festivales que s’entamaben en Bizkaia, lo que nos fexo estrechar llazos y andechar en momentos memorables. Tamién él tuvo oportunidá de visitar depués Asturies en dalguna ocasión con delles agrupaciones, lo que foi sofitando la nuesa conexón. A midida que la nuesa amistá medraba, vimos qu’amás de la pasión compartida pola música de raigañu, tamién mos xunía un vezu gastronómicu; como nun podía ser d’otra mena, ente talos, bacaláu esmigayao, bon quesu y bona sidre, prendióse la chispa de la nuesa rellación musical, entamando una formosa complicidá que tresciende la música.

«Tuvi la fortuna de conocer a Roberto Etxebarria nuna actuación en Xixón. Quedé dafechu ablucáu pol so talentu, la so música y la so entrega. A midida que la nuesa amistá medraba, prendióse la chispa de la nuesa rellación musical»

¿Qué tipu de música vais facer?

L’estilu principalmente va dir enfocáu dafechu pal baille. Dambos músicos compartimos un desendolcu bien apaecíu como intérpretes, docentes y con abonda trayectoria na música del país, lo que nos da pie a ufiertar un repertoriu qu’inclúi pieces tradicionales, composiciones y recreaciones arriquecíes sólidamente pa esfrutar baillando. Con acordión diatónicu o trikitixa, voz, pandereta y otres percusiones, queremos entamar un ambiente vibrante y folixeru qu’amuese los nuesos raigaños culturales.

Anque les collaboraciones ente artistes y grupos del Arcu Atlánticu nun son rares, paez qu’Asturies y Euskal Herria nun suelen xuntase tanto, tando cerca y teniendo munches semeyances no cultural, ¿por qué pienses que ye?

Pienso qu’igual n’Asturies esiste una rellación y un enclín mayoritariu pa colos países del norte del Arcu Atlánticu, quiciabes por buscar collaboraciones con artistes colos que de mano creyemos compartir un contestu más inmediatu, y ye ciertu que tanto Asturies como Euskal Herria, tienen identidaes culturales bien enraigonaes y distintives; poro, a la fin, hai más semeyances que diferencies.

Pa mio ver, Euskal Herria ye un referente na escena musical y artístico, n’infraestructures y sofitos, n’identidá. Roberto ye referente… y emocionante tocar al so llau. L’interés pola diversidá cultural y la collaboración ente distintos territorios, suma; y, amás de mirar pal norte, nun podemos perder de vista lo que se fai pela península.

«N’Asturies esiste un enclín mayoritariu pa colos países del norte del Arcu Atlánticu. Euskal Herria ye un referente na escena musical y artístico, n’infraestructures y sofitos, n’identidá. Amás de mirar pal norte, nun podemos perder de vista lo que se fai pela península»

¿Cómo tais xestionando’l procesu de creación y el proyectu cola distancia pel mediu?

Vivimos a tres hores de distancia… cuasi 300km. Ye difícil coordinase y ensayar de manera efectiva usando plataformes de videollamada; entós, determinamos que caún escueya los temes tradicionales y composiciones, compartiendo partitures y, sobre too, grabaciones.

Yo suelo trabayar la escucha activa de la discografía de Roberto, pa dir familiarizándome coles sos dinámiques, matices y recursos técnicos. Dempués, practico individualmente, enfotándome n’engrasar y afilar deos… Roberto raspia’l virtuosismu. Pa rematar, virtualmente afayamos detalles, repartimos instrumentación y intentamos da-y forma a esa interpretación conxunta que reflexe la influencia de dambos. De toes formes, naguamos por xuntamos en persona y compartir música y mesa.

«Ye difícil coordinase y ensayar de manera efectiva usando plataformes de videollamada. Dempués del llabor individual, virtualmente afayamos detalles y intentamos da-y forma a esa interpretación conxunta que reflexe la influencia de dambos»

¿Cuálos son los puntos d’alcuentru ente la música de raigañu vasca y l’asturiana?

Mesmo n’Asturies que n’Euskadi, hai una fuerte conexón cola identidá cultural; la música ye papel clave nel caltenimientu de les tradiciones. Igual difieren n’estilu y forma, pero compártense raigaños fonderos. L’acordión y la percusión igual son la instrumentación más común.

Ritmos y dances similares, como fandangos, xotes y muñeires, que son habituales pa dambos. Igualmente’l repertoriu vocal popular, que suel enfotase en temes venceyaos a la vida rural, la ñatura, les tradiciones y los vezos llocales. Creo que somos bon exemplu na celebración del nuesu heriedu.

Y falando de la escena y el sector, ¿qué diferencies ves ente dambos territorios?

Home, n’Asturies hai daqué menos de la metá d’habitantes que n’Euskadi, onde yá de por sí, dende equí percíbese una industria musical más desenvuelta y con mayores recursos, en comparanza. Entiendo que les mayores diferencies puean vese en términos d’inversión, infraestructura, sofitu institucional y quiciabes en formación. Euskadi aparenta una mayor inversión mesmo pública que privada, sofitos institucionales, iniciatives y fondos específicos pa la música, los artistes y la cultura en xeneral, promoción, festivales de sonadía, sales de conciertos, estudios…

N’Asturies, anque haya esfuerciu pa sofitar la música, la cantidá de recursos vese menor o más llindao, la ufierta ta más amenorgada, el sofitu institucional -poco presente- y el priváu son muncho menos fuertes. Esperemos que proyectos collaborativos como esti sirvan d’apoyu pa potenciar la crecedera de la industria en dambos territorios.

«N’Euskadi percíbese una industria musical más desenvuelta y con mayores recursos, en comparanza. N’Asturies los recursos tán más llindaos, la ufierta más amenorgada, y el sofitu institucional y el priváu son muncho menos fuertes»

Pa finar, ¿cuándo vamos poder vevos y ónde?

Tamos preparando’l proyectu con muncha ilusión y ye bien prestoso tar contando que vamos poder entamar a rodalu, quiciabes per primer vegada, esti branu nun festival xixonés.