Esti sábadu 28 de marzu finó a los 92 años d’edá Irene Sierra Herrero, más conocida como Yrene d’Anxelu o Yrene de Tresmonte. Foi una de les principales facedores de pandeiros tradicionales d’Asturies y una figura clave nel caltenimientu y tresmisión del patrimoniu oral, cultural y artesanu del país. El so conocimientu de la tradición foi recoyíu por persones recopiladores y estudioses de la cuestión y tamién quedó rexistráu audiovisualmente dientro del programa Camín de Cantares y la premiada película Muyeres, dirixida por Marta Lallana.
El so funeral foi esti domingu en Cangas del Narcea y la so perda mui llamentada dende’l mundu de la música y la cultura tradicional. MUSICASTURIANA.COM sumámonos al duelu y agradecemos fondamente’l llabor que desendolcó pa tresmitir la cultura de raigañu d’esti país. Anque les sos manes yá nun puedan llabrar la madera y coser el pelleyu, la música de los sos instrumentos va siguir sonando tres los pandeiros pintaos coles lletres Y.S.
Semeya cedida pol ATOAM (Archivu de la Tradición Oral d’Ambás)
Suscríbite a les nuestres novedaes
