Poemes de muyeres protagonicen el nuevu espectáculu de Toli Morilla
Esti vienres 18 a les 19h na sala Loreto de Colunga estrénase’l nuevu espectáculu de Toli Morilla, Muyeres Poetes en Canciones. El veteranu cantautor presenta esti eventu como «un conciertu mui íntimu, solo con guitarra y dalguna harmónica» y nel que recueye «cantares compuestos dafechu sobre poemes de muyeres de los discos ‘Nueche d’Insomniu‘ y ‘Entropía‘», dos de los trabayaos más renomaos de la so carrera.
D’esta manera, obres de poetes asturianes como María Teresa González, Marta Mori, Taresa Lorences, Aurora García Rivas, Laura Fjäder, Elvira Laruelo o Rosa Taurán, van sonar enriba l’escenariu. «L’espectáculu incide nos testos contemporáneos, nes diferentes formes d’escribir y cómo eses formes d’escribir dan con una melodía apegada al testu y unos acordes que son suxerentes p’ayudar a que les pallabres salgan y rellumen», esclaria Morilla.
Tres del estrenu en Colunga d’esti vienres, el cantautor va llevar tamién esti espectáculu al Espaciu Cultural El Liceo de Navia, el 24 de marzu a les 19.30h. La entrada ye llibre y estes actuaciones formen parte d’Asturies Cultura en Rede, el circuitu d’eventos artísticos promovíu pola Conseyería de Cultura, Política Llingüística y Turismu,
La veteranía del cantautor
Toli Morilla ye’l más veteranu de la xeneración de cantautores posterior al Nuevu Canciu. Tamién ye de los más aclamaos, con dellos gallardones y nominaciones en premios musicales d’ámbitu estatal y asturianu. Con una cuidada propuesta musical qu’entemez el rock acústicu, la canción d’autor y el folk, tien una discografía que se remonta a 1998 y que ta formada por ocho referencies ente discos d’estudiu n’asturianu y castellanu, un directo, un compilatoriu y el CD de versiones de Bob Dylan n’asturianu.
