Ugía Pedreira publica’l discu ‘Segmento cantábrico’
La cantante gallega afincada dende hai años en Castropol, Ugía Pedreira, asoleya’l cantar (y vídeu) de presentación del so primer discu en solitariu, tituláu ‘Segmento cantábrico’, qu’apaez firmáu col nome A Pedreira. La pieza que llanza agora lleva por nome «Mares sucados» y ye un exemplu de lo que se puede alcontrar y escuchar nesti trabayu nuevu. Un álbum de folk progresivu onde axunta formes tradicionales de la mariña cantábrica con infuyencies de la world music europea y el folk americanu, con momentos tamién de spoken word y lletres d’un calter fondamente poéticu; nél inclúi tres temes cantaos en gallego-asturianu.
Un trabayu qu’entemez música y poesía, incorporando un pequeñu poemariu de nome ‘Atalaia Norte’ nel que l’autora plasma en versos la inspiración que dende neña-y proporciona la conexón «per vía marítima coles tribus, clanes y pueblos bañaos pel Cantábricu, dende Ortegal, en Galicia, a la islla d’Ouessant, en Bretaña».
Esti discu fai’l númberu trece de la so carrera, pero ye’l primeru que firma en solitario. Los sos oríxenes musicales tán nuna banda folk gallega qu’algamó bien de sonadía nos años 90: Chouteira, col que diba grabar tres trabayos discográficos. Escomenzando entós bien de collaboraciones con formaciones estremaes fuera del ámbitu de la música tradicional y el folk; mesmamente tuvo bien de presencia na escena rockera gallega de la mano de bandes como Xenreira, Nen@s da Revolta, A Matraca Perversa o Galegoz. Yá afincada n’Asturies publicaría nel añu 2018 un llibru-discu embaxo’l nome d’A Comuna del Barruzo, dirixíu al públicu familiar y con presencia del gallego-asturianu nes sos composiciones.
Nel vídeo-clip de presentación d’esti primer trabayu en solitario rescampla la influyencia que tien pa ella l’occidente asturianu, faciendo’l paisaxe parte esencial del mesmu.
