Tres d’estrenar la selmana pasada’l videoclip, la ‘Polka Burbús’ yá ta en toles plataformes musicales. Esti ye’l primer tema de Cifuentes, Stoldtz y Cía., proyectu nuevu qu’axunta a la Banda Gaites Villa de Xixón y a la Gijón Jazz Band. La pieza bebe del contraste ente les sonoridaes jazz y la música tradicional; ente les gaites, caxes y timbales colos trombones y trompetes; too ello col oxetivu de «buscar un llinguaxe nuevu» que faiga a estes dos formaciones «entendese y apoyase ente sí».
«Como toles bones ciudaes, Xixón ye un llugar de contrastes. Esos contrastes son los qu’emburrien a dos formaciones mui estremaes a collaborar y crear un proyectu nuevu», despliquen dende Cifuentes, Stoldtz y Cía. pa desplicar l’orixe d’esta iniciativa que toma por nome’l de la compañía creada pol empresariu xixonés Anselmo Cifuentes y l’inxenieru Stoldtz qu’a finales del sieglu XIX construyó’l «primer buque de fierro d’España«, como desplica’l grupu na descripción del videu de YouTube.
D’esta manera Villa de Xixón y Gijón Jazz Band collaboren tamién col arreglista y compositor navarru Iñaki Askunze, que ye docente nos prestixosos Conservatorio Superior de Música del País Vasco (Musikene) y nel Conservatorio Superior de Música de Navarra (CSMN). «Askunze entendió dafechu’l potencial de la gaita asturiana y escribió unos arreglos nos que les dos bandes formen una, con un repertoriu tanto de temes tradicionales como de nueves composiciones», despliquen dende la formación. La primer amuesa d’esto yá pue vese y sentise con esta ‘Polka Burbús’ y dende Cifuentes, Stoldtz y Cía. avancen que va haber más novedaes porque, como dicen, «tiempos revueltos traen nueves aventures».
Suscríbite a les nuestres novedaes
