Porrúa ponse en boles
Los díes 8, 9 y 10 de xunetu va desenvolvese la segunda edición del festival ‘Porrúa en bolas’, un alcuentru que los propios organizadores presenten como una «intervención artística en bolas de silu». Depués del éxitu algamáu cola primer convocatoria, vuelve esti orixinal festival a esi llugar del oriente del país que va enllenar d’artistes y públicu los praos de la rodiada. L’actividá central del festival ye la tresformación de les boles nes que s’endolca’l silu (lo qu’enantes seríen los balagares) nun llenzu sobre’l qu’artistes de tendencies estétiques estremaes pinten les sos obres.
Esti añu, les actividaes escomiencen el vienres, con una xornada dedicada a la reciella, na que los neños y neñes participantes van poder espresase artísticamente, amás d’otros xuegos y entretenimientos. El sábadu va ser el ‘día grande’ cola llegada de los artistes asturianos y foranos que van plasmar en múltiples boles les sos creaciones a partir de les 11:00 hores y que’l públicu va poder presenciar en directo. Esi mesmu día va desenvolvese tamién la romería del Llaciniegu, entamada pola Asociación Cultural Llacín nel prau del mesmu nome; a partir de les 14:00 hores va facese la entrega del bollu a los socios y socies de l’asociación y darréu la xinta albentestate (abierta a tol públicu). A les 17:30 ta previstu un taller de baille, pa depués escomenzar cola sesión musical, que va tar protagonizada pola Bandina Llacín, Héctor Braga, Banda de Gaites Llacín y Tarde en Danza col Grupu Llacín-L’Oriente. La nueche (22:30 hores) va tar amenizada pola Bandina Los Indianos y el Dj Cardeo. El domingu va ponese’l ramu al festival con una ‘sesión vermú’ na que los artistes van rematar les obres del conocíu como arte efímeru; unes boles de silu que van quedar «espuestes» hasta que la xera agrícola lo permita.
La directora del festival, Nieves González, foi la ideóloga d’esti eventu que quier averar l’arte a lo rural, nesti casu al so pueblu, franciendo estereotipos y prexuicios, aprovechando les posibilidaes qu’ufierta un entornu como esi.
