Yá a la venta los vinilos de ‘N.O.S’ y ‘Sangre y Fierru’
Cada vez son más los grupos que s’animen a editar o reeditar los sos trabayos discográficos en vinilu. Dende esta selmana yá se pue mercar en musicasturiana.com nesti formatu el segundu trabayu de L-R ,’N.O.S’, y l’únicu discu qu’asoleyó el desapaecíu grupu Oi! N’ast, ‘Sangre y Fierru’.
L-R publicaron ‘N.O.S’ en CD y plataformes dixitales en xunu del añu pasáu. Nesti segundu discu, el dúu afonda na propuesta del post-folk-asturianu dando como un resultáu un trabayu mui completu y cuidáu qu’ensin dulda ye ún de los grandes discos de la nueva música asturiana. Dempués de superar con éxitu una campaña de crowdfunding pa editalu y de dellos meses d’espera, el vinilu yá ta disponible por un preciu de 20 euros.
Oi! N’ast foi un grupu d’Oi!, punk y hardcore de Xixón con lletres n’asturianu dafechu. ‘Sangre y Fierru’ (2002 Brixton Records) ye l’únicu trabayu que publicaron; un álbum de cultu pa los amantes d’esti estilu musical. Venti años dempués, esti discu ve la lluz en formatu vinilu con una doble edición: una “cenciella” y otra con vinilu de color. Amás, les dos ediciones inclúin dos cantares inéditos.
