El CISLAN y el Maízu Rock retomen dos convocatories de concursos pa grupos nos meses vinientes. Per un llau, el CISLAN torna a celebrar una nueva edición del so tradicional concursu de maquetes, pal que’l plazu d’inscripción yá ta abiertu. Per otru, el festival Maízu Rock da anuncia del so concursu de bandes, pal que pueden solicitase les bases al traviés del so corréu electrónicu -elmaizurock@gmail.com-.
El CISLAN (Centru Integral de Formación Profesional de Comunicación, Imaxe y Soníu de Llangréu) vuelve a convocar una edición nueva del so concursu de maquetes. La participación na XVI edición d’esti galardón ta abierta hasta’l xueves 28 de payares y nella va poder participar cualquier proyectu musical asturianu que nun tenga tovía nengún trabayu discográficu editáu y que presente una maqueta con cuatro temes -de los qu’a lo menos tres tienen que ser de composición propia-. El premiu principal inclúi la grabación d’una maqueta de cuatro temes nos estudios del CISLAN, la producción y realización d’una sesión de semeyes, la producción musical pa una plataforma de streaming agospiada na web d’esti centru educativu y la producción de dos conciertos.
Les bases completes del concursu tán publicaes na web del CISLAN y ente elles destaca que’l xuráu va escoyer a tres finalistes que tienen que defender la so propuesta con dos conciertos nes instalaciones d’esti CIPF -qu’a la vez, van ser emitíos pela so canal de YouTube-. El 18 d’avientu va conocese’l proyectu ganador del primer premiu yá mentáu y del premiu del públicu, qu’inclúi la producción y realización de una sesión fotográfica. Toles recompenses van tar desendolcaes pol propiu alumnáu del CISLAN, fomentando asina la so participación y esperiencia en proyectos musicales, audiovisuales y de producción d’eventos.
Suscríbite a les nuestres novedaes
