RPA emite 20 miniespacios dedicaos a Ígor Medio y TPA el documental y El Conciertu d’Ígor
La Selmana de les Lletres Asturianes, na edición númberu 43, ta dedicada al músicu y dibuxante xixonés Ígor Medio Tuya, que nesti 2022 cumpliría 50 años. Asina, del martes 3 al vienres 6 de mayu la Conseyería de Cultura, Política Llingüística y Turismu del Gobiernu Asturianu entama delles actividaes centraes na so figura. Por cuenta d’esta conmemoración, la radio pública asturiana (RPA) va emitir un garrapiellu de pequeñes pieces o píldores radiofóniques centraes nel homenaxáu. Les mesmes van salir a les ondes nun númberu de cinco diaries depués de los informativos y la cadena televisiva TPA emite’l documental ‘Onde soi quien quiero ser’ y El Conciertu d’Ígor Medio.
Nacíu en Xixón en 1972, Ígor Medio Tuya foi un creador al que la etiqueta de multidisciplinar podía aplicáse-y en tol so sentíu. Sicasí, la so prometedora trayectoria profesional viose acabada tempranamente pol so fallecimientu nun accidente de tráficu nel añu 2006. En 1990 formó parte, xunto al tamién xixonés Ruma Barbero, del grupu d’alumnos de Belles Artes de Salamanca, col que formaría’l grupu musical Felpeyu, nel qu’Ígor, amás de la voz principal, encargábase de componer y arreglar les pieces, amás de tocar la guitarra, la mandolina y buzuki. Paralelamente a la so faceta como músicu, Ígor desendolcó una importante actividá nos campos de la historieta, la ilustración y l’humor gráficu, onde destacó una tira diaria publicada na prensa asturiana titulada La familia Castañón.
Nes pieces radiofóniques va tratase fondamente la vida y la obra d’Ígor Medio, ufiertando tamién dellos documentos sonoros perinteresantes y inéditos. Amás d’ello, van participar tamién una ventena de persones venceyaes a la música, la lliteratura o’l comic que tuvieron rellación personal o profesional col homenaxáu o otres que, anque nun llegaron a conocelu, falen de la so importancia y influencia nel panorama musical o historietísticu asturianu. Ente les voces que van poder sentise tán les de: Ruma Barbero, Marta Mori, Lisardo Prieto, Xosé Ambás, Javi Kactus, Neto, Alfonso Zapico, Xune Elipe, Andrea Joglar, Lisardo Lombardía, Leticia Baselgas o Ignacio Llope.
Programación en TPA
Amás d’esto TPA emite una programación especial rellacionada cola figura d’Ígor y la cultura asturiana. Ente los conteníos venceyaos a la música s’inclúi’l documental ‘Onde soi quien quiero ser’, el martes 3 de mayu a les 21.15h, dedicáu a la figura d’Ígor y estrenáu güei pa inaugurar la 43 Selmana de les Lletres Asturianes; un programa de ‘Pieces‘ nel que, ente otros, participen Burbús y Ruma Barbero; y la emisión d’El Conciertu d’Ígor Medio el domingu 8 de mayu a les 23h.
