Esti sábadu 12 d’aochobre a les 11.30h el Grupu de Baille Tradicional San Félix vuelve a poner en pie en Candás Llamando a Conceyu, l’espectáculu col que la formación punxo’l ramu al so 40 aniversariu l’añu pasáu. La obra quier dar un pasu alantre na renovación de la conxunción música y baille tradicional, creando un nuevu conceptu de pasucáis que, acompañáu de la palabra, avéralu al teatru de cai. La música, influenciada por dellos estilos pero sofitada nos sones tradicionales, ye autoría de Javier Tejedor y ta interpretada por él, Rubén Bada, Kike Dembinsky, Pepín de Muñalén, Silvia Quesada, Eva Tejedor y Marisa Valle Roso.
El baille ta más averáu a la tradición, pero intenta amosar muncho más, y representar asina les palabres pronunciaes por una persona, los sos suaños, les sos alcordances. Una palabra que fala de los conceyos abiertos, que tuvieron un papel cimeru na organización social de los pueblos, y qu’entá se caltienen en dellos llugares d’Asturies. Ye una palabra actual y flexible, que cambia d’un sitiu de representación a otru, averándose a la hestoria, la cultura y la realidá d’esi llugar. Porque Llamando a conceyu naz de la sociedá pa la sociedá.
La idea orixinal d’esti espectáculu ye de Xurde Fernández, escritor y director del GBT San Félix; la interpretación ye de l’actriz Raquel Prendes, que tien participao n’abondos montaxes teatrales y anguaño imparte clases d’entrenamientu actoral y interpretación pa profesionales y amateurs; y el baille pónenlo los y les componentes de San Félix.
40 años de tradición
El Grupu de Baille Tradicional San Félix nació en 1983 en Candás. A lo llargo de 40 años vien representando y amosando los bailles, dances y cantares tradicionales d’Asturies, amás de la ropa d’antaño. En 2013 produxo Palabres (Premiu de la Crítica RPA al meyor espectáculu del añu), qu’axuntaba lliteratura, artes ecéniques, arte audiovisual, música y baille buscando dar un pasu na renovación del baille asturianu. Llamando a conceyu ye la so segunda producción y quier volver el pasu dau hai diez años en reblagu.
Suscríbite a les nuestres novedaes
