Ayeri Corquiéu dio anuncia nes sos redes sociales de la marcha del grupu de la que foi la so cantante solista nos caberos once años: Lluci G. Palomares (Avilés, 1975) .Cantante y panderetera, anguaño forma parte del colectivu de música tradicional Muyeres y foi cantante solista del grupu de folk ribeseyanu Corquiéu hasta esti últimu conciertu na Folixa la Sidre‘l sábadu pasáu. Tien collaborao en delles ocasiones con grupos como Dixebra, José Manuel Tejedor, La Bande, D’Urria, Felpeyu y Músicos Pola Oficialidá, amás d’en distintes formaciones de música tradicional y nel proyectu “El mio cantar”.
Los sos compañeros de Corquiéu anunciaben asina la noticia: «A vegaes, les circunstancies familiares y llaborales nun nos permiten desarrollar y compatibilizar el llabor artísticu. Esi llabor que tantu amamos y queremos los músicxs. Por eso güei tócanos despedir a la nuesa cantante, Lluci Gonzalez. Dende Corquiéu queremos agradecé-y el so llabor y la so implicación pa con nós durante los últimos 11 años y deseá-y muncha suerte nel camín de la vida, esi camín nel que, de xuru, volveremos a alcontrarnos, porque los vinculos afectivu-emocionales y les vivencies que se crean a través de la música son irrompibles. Siempres sedrás parte d’esta familia y esti grupu. Querémoste! Muncha suerte Lluci»
Suscríbite a les nuestres novedaes
