Esti vienres La Pola Siero celebra’l XVIII Certamen de Cancios de Chigre, cita entamada pola asociación Amigos del Roble na que dieciséis tertulies van echar unos cantares per distintos llocales de la capital sierense pa reivindicar y «recuperar l’espíritu daquelles tertulies que s’entamaben alredor de la sidra en La Pola Siero». Amás, la organización va distinguir al ex presidente de Cantabria, a Miguel Ángel Revilla, cola insignia d’honor. Pa falar d’ello y afondar nel presente y futuru de la canción asturiana, entrevistamos a Miguel Ánxel Montenegro (Xixón, 1977), que dende hai un añu ye’l presidente d’Amigos del Roble. Tamién ye miembru de l’asociación Afatra (Asociación de Folclore Amigos de la Tradición), cola qu’organiza’l Concursu de Canción Asturiana Conceyu de Siero, qu’entamó va dos selmanes y dura hasta abril.
Montenegro lleva venceyáu a movimientos socioeducativos y culturales dende los 11 años. Formó parte de varios grupos de música rock y folk, ente los que destaca Xera, ye tamboriteru, maestru y, dientro d’esta xera, tien trabayao proyectos musicales didácticos dientro del aula, como’l de «Cartes Diego”, qu’afonda en temes d’acosu escolar y suicidiu y nel qu’al traviés de cartes escrites pol alumnáu, compúsose un cantar que grabó’l grupu Gente Terrible.
Hai un añu asumisti la presidencia de l’Asociación Amigos del Roble. ¿Cuálos son los oxetivos que tenéis y les actividaes que desendolcáis nesta asociación?
Esta ye una asociación que ñaz lliteralmente nun chigre. Contitúise pa da-y cobertoria llegal a la plantada del Roble, que los casaos vienen plantando dende tiempu inmemorial na viéspora de San Pedro. Una vez llantáu, la xente entona al pie del tueru “Les Sanpedraes” coples sátires improvisaes que falen de tolo asocedío nel añu. Esti ye’l día grande de l’asociación, onde se fai’l repartu del bollu preñáu y la botella vino a la xente socio.
Los oxetivos son bien nidios: caltener toes aquelles manifestaciones culturales que formen parte de la identidá polesa y que suma al patrimoniu asturianu. Nesti sentíu Amigos del Roble entamó va 20 años (pandemia mediante) el certame Cancios de Chigre , una cita importantísíma nel calendariu cultural de la villa. Amás d’esto l’asociación concede los gallardones añales: Personaxe y chigreru/a del añu, pa rescamplar la xera de diferentes persones y colectivos de La Pola. Nel casu del chigreru/a ta venceyao a los que collaboren con nós y en pro del desarrollu cultural del conceyu. Ensin mayor pretensión, esta asociación xenera un impactu sociocultural y económicu bien bultable.
«De 166 persones asociaes qu’había cuando garramos l’asociación tamos yá averándonos a 400. Nun ye importante la cantidá pero ye significativo pol fechu atrayer al colectivu a xente mozo que s’avere a les tradiciones»
Sustituyisti a Enrique Meoro, que llevaba 17 años nel cargu. ¿Cuáles son les novedaes qu’aniciasti y que quies desendolcar respecto a l’anterior directiva?.
Formamos una directiva bien prestosa, tamos en procesu d’aprendizaxe y hai muncha ilusión y enerxía. Conformamos un grupu humanu heteroxéneu en cuantes a edá, xéneru y saberes. Ye dalgo intencionao. La tradición necesita relevu y visibilidá, pero nun namás de paisanos, claro. La llinia de trabayu ye bien cenciella: caltener los principios asociativos ya intentar actualizar la imaxe y toes aquelles cuestiones que los nuevos tiempos desixan. Al empar de la plantá del Roble, el gallardón de Personaxe y Chigreru/a del añu y de los Cancios de Chigre (buque insignia de l’asociación), nesti primer añu recuperamos la fiesta de San Pedro (patronu de La Pola) col envís d’aportar un puntu de coherencia a lo que tamos festexando y entamamos el primer mes del Roble: actividaes divulgatives, escursiones y promociones pa la xente socio n’establecimientos de Siero, Xixón y Nava; presentando’l carné d’El Roble teníes descuentu en menús, ropa o la botella sidra salíate más barato. Un esitazu xeneral pola acoyida de la xente. De 166 persones asociaes qu’había cuando garramos l’asociación tamos yá averándonos a 400. Nun ye importante la cantidá pero ye significativo pol fechu atrayer al colectivu a xente mozo que s’avere a les tradiciones (tenemos 30 socios y socies menores de 18 años).
Una de les actividaes con más sonadía que desendolcáis ye’l certame de Cancios de Chigre, qu’esti vienres 13 aporta a la XVIII edición. Pa la xente que nun conoza l’eventu, ¿pues desplicar en qué consiste?
Los Cancios de Chigre ¡son la reostia!. Nació pola necesidá de rescatar una manifestación tan asturiana y guapa como ye la de cantar nos chigres, dalgo que taba perdiéndose, bien por “esnobismu” o bien por repunancia y falta de respetu pola identidá de nueso. El términu “tertulia» (qu’usamos pa facer referencia a les formaciones musicales de los cancios) xurde de les xuntances que s’entamen nos chigres nos díes de fiesta o de mercáu. Vien d’antiguo qu’ellí la xente aconceyaba pa zarrar la robla, pa ponese al día, pa cortexar, pa comer y beber y de forma espontánea pa cantar (asturianaes, cantares populares…). “Equí puede cantase” o “alredor de la sidra La Pola Canta” son lleendes venceyaes dende’l minutu ún a los Cancios de Chigre. Ye la cultura sidrera de nueso. Y ye dalgo qu’hai qu’agradecer a Enrique Meoro y Valentín Fuente cuando decidieron organizar la primer edición. Naquellos tiempos nun había tertulies y tuvieron qu’echar mano de coros. Gracies a ello, vimos nacer formaciones como Los Ñerbatos, El Ñeru de Rá o otres tantos grupos. Les tertulies son l’alma, la cadarma y el corazón d’esta fiesta. Nun hai pallabres p’agradece-yos lo que faen. Hai una en concretu que vien participando dende les primeres ediciones y aporten dende Vargas (Cantabria). Llámense La Capia y son mui grandes. En realidá, toes lo son.
Esta idega de Cancios de Chigre naz en La Pola Siero y de secute, espárdese per otros conceyos, anque l’oxetivu de nueso ye fundamentalmente cultural. ¿Qué ye lo que va topar la xente que venga a La Pola esi día? un ambientazu espectacular. Too acutao va tiempu
«El términu “tertulia» (qu’usamos pa facer referencia a les formaciones musicales de los cancios) xurde de les xuntances que s’entamen nos chigres nos díes de fiesta o de mercáu. Vien d’antiguo qu’ellí la xente aconceyaba pa zarrar la robla, pa ponese al día, pa cortexar, pa comer y beber y de forma espontánea pa cantar»
¿Cuántes tertulies participen esti añu y qué pues valorar d’elles?
Esti añu medra la participación, tanto de tertulies como de chigres. La convocatoria pa dambos fáise respetando «galones». Quier dicir, que tanto tertulies como chigres que tengan más participación n’ediciones anteriores tienen prioridá. El casu ye qu’aumentamos númberu respecto al añu pasáu de doce a dieciséis tertulies, incorporándose xente nuevo como Alba (Seis Riales) que xuntó a cares tan conocíes como Consuelo Riu, Fran Pola o Julio C. Fernández pa entamar la Tertulia El Revolvín, o la que l’artesanu Chus Solís formó dende Noreña, la Tertulia El Magüetu, o la xente yerbato del Corriellu la Pandorga, que ye la primer vez que participen. Ye cultura popular, ye tradición viva. Si tuviéremos que facer una etiqueta o hashtag sedría #culturapopastur. Nun puede desplicase. Hai que lo vivir.
Vais editar 2000 exemplares del cancioneru que se va cantar y nél recoyéis casi una trentena de cantares. ¿Repetís tolos años los cantares o vais camudando? ¿Cuál ye’l criteriu a la hora d’escoyelos?
El criteriu ye que seya popular. Tolos años van camudando dalgunos, pero caltiénse la mayor parte del repertoriu. L’oxetivu ye que la xente cante y que la xente que nun sepa cantar… cante tamién. La fiesta ye del pueblu, les tertulies animen pero tol mundu se suma.
«Buscábemos una persona que faiga, como Vanessa Gutiérrez l’añu pasáu, un apueste nidiu y respetuosu pola tradición oral y la identidá cultural. Ente la llista de nomes que se baraxaben, Revilla foi cabezaleru: canta asturianada, ye del Sporting, asiduu a les grandes fiestes del país y siempre fala bien de la nuesa tierra»
L’actividá entama col actu d’entrega de la Insignia d’Honor, qu’esti añu vais conceder a Miguel Ángel Revilla. ¿Cuáles son les razones?
Ye una de les novedaes de la nueva directiva. Quiximos anovar pero respetando les finalidaes asociatives. L’añu pasáu tuvimos la visita de Vanessa Gutiérrez, la conseyera de Cultura y pasólo podre. Decatámonos al entrar pelos diferentes chigres qu’ella, pol cargu que tien, nun fuera que rompiera l’ambiente, a la escontra: dignificaba al empar que formaba parte. Ye dalgo que nunca nun tuvimos n’Asturies. D’ehí xurde la idega de facer un apadrinamientu/amadrinamientu del certame: una persona que faiga, como Vanessa, un apueste nidiu y respetuosu pola tradición oral y la identidá cultural. Ente la llista de nomes que se baraxaben, Revilla foi cabezaleru: canta asturianada, ye del Sporting, asiduu a les grandes fiestes del país y siempre fala bien de la nuesa tierra. Nun ye una cuestión política sinón de compromisu. Llanzámos-y l’órdagu y agora tenemos les cartes sobre la mesa. Ye la primera insignia que ponemos y tamos pensando yá cuála va ser la viniente.
¿Echará unos cantarinos per La Pola?
¿Unos? De xuru va ser el xefe. Ta siendo complicao organizar esti actu porque hai muncha espectación. Tol mundu quier saber onde va tomar un culete. Molaría muncho y diba flipar si lu lleváremos per tolos chigres, pero nun ye posible.
Amás d’Amigos del Roble, tamién yes miembru de l’asociación Afatra (Asociación de Folclore Amigos de la Tradición). Si pues tamién afondar más nos oxetivos y llabor d’esti colectivu…
Afatra y Amigos del Roble son hermanes. Collaboramos mano a mano en caúna de les actividaes respectives. La vida date sorpreses y ente elles, colos años, daste cuenta que la tradición oral siempre ta presente. Yo soi un meru espectador, un aprendiz de bruxu que va garrando posiciones en función a que los verdaderos maestros y maestres tuvieron que dexar pasu. Afatra ye un espaciu brutaliegu d’intercambiu de saberes y una especie de guardiana de la tradición.
Les finalidaes son bien importantes: la defensa de la música del país (la pareya de tambor y gaita), dignificar el repertoriu y la indumentaria y la canción asturiana. Ente los proyectos que se desendolquen, quiciabes el que más rescampla ye la propuesta que ficimos pa la creación del Premiu Obdulia Álvarez «La Busdonga” d’Asturianada, que foi el resultáu de cinco años de trabayu y reuniones. Anguaño ye una realidá y ye un pasu alantre na apuesta que l’alministración tien pa con esti Bien d’Interés Cultural.
«Ente los proyectos que desendolcamos n’Afatra, quiciabes el que más rescampla ye la propuesta que ficimos pa la creación del Premiu Obdulia Álvarez «La Busdonga” d’Asturianada, que foi el resultáu de cinco años de trabayu y reuniones. Anguaño ye una realidá y ye un pasu alantre na apuesta que l’alministración tien pa con esti Bien d’Interés Cultural»
Afatra entama’l Concursu de Canción Asturiana Conceyu de Siero, certame del qu’hai dos selmanes entamó la so XIV edición. ¿Qué valoración faes de la participación d’esti añu y de les dos xornaes celebraes? ¿Cómo veis dende Afatra la evolución d’él? Dígolo porque paez que’l discursu que más se siente ye’l de que nos concursos cada vez participa menos xente y hai menos públicu…
Encuantes al concursu de Siero, llevo 8 años deprendiendo y trabayando mano a mano con xente esperto. La manera d’entender la complexidá y les característiques del patrimoniu ye echando hores y apostando por él. Asegúrote qu’hai un trabayu detrás escomanáu. Cada concursu tien la so idiosincrasia, pero’l trabayu ye bien parecíu. Voi aportar datos del de nueso: l’añu pasáu: na XIII edición hebo 42 persones inscrites; esti añu 50. Na edición anterior dos pareyes en dialogada y esti añu seis, xente que debuta nel concursu. El doble de públicu nes primeres xornaes… Claro que nun son cifres que puedan asemeyase a les de la época dorada de l’asturianada, pero hai una tendencia al alza.
A min esi supuestu discursu enfádame, porque ye una falta de respetu pol trabayu voluntariu que se fai por una causa mui noble, que nun fai naide. Y agora pregúntome ¿Quién lo diz? ¿Qué interés pueden tener pa facer esa afirmación? ¿qué trabayu faen pal caltenimientu de la canción asturiana? ¿tuvo esa xente dalgún sábadu nel teatru Toreno de Cangas y vio l’ambientazu o sabe del trabayu espectacular que fai la xente del Ciudá de Llangréu pa sacar esi concursu p’alatre? ¿Ofreciéronse nalgún momentu pa echar un gabitu? Porque lo que fai falta ye xente que sume y que construya. Oféndeme la crítica falta de rigor. Cualesquier persona opina, incluso la que nin siquiera tien interés por ello. ¿Por quién piensa esa xente que se caltién la tradición? Si tanto-yos importa que vengan y apoyen que de xuru amás van deprender daqué.
«Enfádame’l discursu críticu colos concursos, porque ye una falta de respetu pol trabayu voluntariu que se fai por una causa mui noble, que nun fai naide. En Siero tenemos más participación que l’añu pasáu, hai una tendencia al alza»
Otru tema del que se vien falando dende hai una montonera años ye’l de la renovación d’asturianada; mesmo en relevu xeneracional como en propuesta musical. ¿Tú cómo lo ves
Entiendo que tien d’haber espaciu pa too pero dame qu’esta afirmación xurde de la mesma crítica pa colos concursos de canción asturiana. Ríncha un poco porque parte d’una premisa falsa. Los concursos velen pol caltenimientu de les particulariedaes de l’asturianada, la so llinia céltica. Ye una una xoya del patrimoniu sonoru del mundu y en gran parte consérvase gracies a estos concursos. Los y les cantadores dediquen munches hores d’estudiu y créeme que tienen un méritu pergrande. Y eso nun ta reñío con que puedan xurdir otres corrientes, claru que sí, pero dexemos en paz a los concursos, o en tou casu apoyémoslos, que bastante trabayu tan faciendo pola cultura nos sos conceyos. ¿Por qué esi rucu rucu de querer camudar lo qu’hai? Naide se-y ocurriría tirar Santuyano pa montar un Calatrava, pero por embargu cuestionamos una tradición centenaria buscando naide sabe bien el qué. ¿Más públicu? ¿Intereses personales? El llegáu que tenemos vien de la tradición oral y ye dalgo vivo que se constrúi y se pasa adulces a les xeneraciones vinientes. Que vien del pueblu y quien lo camuda ye la xente del pueblu. Ye una pena perder esi sen.
Encuantes al relevu, tampoco hebo nunca enantes un grupu de neñes y neños tan bayurosu. ¿qué pueden ser 30? ¿40? Claro que nun son munchos y que faen falta más recursos a tolos niveles pero los que tenemos son un regalu qu’hai que cuidar y apurrí-yos espacios dignos pa que canten. Xente dende los 8 a los 20 años que lo mesmo sienten a Bad Bunny qu’a Los Cuatro Ases y que xuben al escenariu con una elegancia que ye una maraviya. ¿Que son pocos? Quiciabes. ¿Qu’hai futuru? Por supuesto.
«Naide se-y ocurriría tirar Santuyano pa montar un Calatrava, pero por embargu cuestionamos una tradición centenaria buscando naide sabe bien el qué. ¿Más públicu? El llegáu que tenemos vien de la tradición oral y ye dalgo vivo que se constrúi y se pasa adulces a les xeneraciones vinientes»
A mí una de les coses que más me llama l’atención ye qu’históricamente la innovación musical na asturianada vien protagonizada por muyeres: “La Busdonga”, Mariluz Cristóbal Caunedo, Anabel Santiago, Marisa Valle Roso, Anabel Antón, Alicia Villanueva, María Latores, Lucía Rojo… ¿Por qué crees que ye?
Hestóricamente les muyeres siempre tuvieron que demostrar más pa nun llegar el mesmu puntu. Yo veolo nos concursos: anque son menos, el nivel ta bastante penriba de los homes. Amás de la pasión, na seriedá y nel saber tar son referentes. Les seis que llegaron a les semifinales del Obdulia esti añu son buena amuesa d’ello.
Sicasí nun hai que minusvalorar la xera de los paisanos y nesi aspectu El Presi marcó la diferencia y sentó un estilu nuevu del que bebieron les siguientes xeneraciones d’intérpretes. Anguaño topamos xente como Carlos Velasco, que tien dellos proyectos musicales nos que toca diferentes estilos. Pero toes y caúna d’estes persones de les que falamos respeten, saben y deprenden de la tradición.
Agora si me permites abro una reflexón. Nos tiempos caberos siento como que se fala muncho de la necesidá d’anovar, qu’hai una especie de priesa o carrera por ello, como si fuera la tabla de salvacion de la canción asturiana. Con esta presión da la sensación de qu’hai que valtiar lo que tenemos cual adolescente que refuga del saber de so güela. Pa min la tradición ye tolo contrario: ye anovación n’estáu puru. Pero la creación requier de los sos tiempos y de persones xenies que nacen de cuando en cuando. Y l’anovación nesti sen nun ye cantar al piano (yá lo facía la busdonga hai 100 años), nin samplear la voz d’una muyer pa facer electrónica, qu’eso yá lo fizo Martyn Bennet nos años noventa… Si creemos y queremos respetar el ritmu de la tradición oral, sigamos anovando selemente, colos recursos que mos ufre la tecnoloxía pero col respetu de lo qu’heredamos. Si queremos facer otra cosa, faigámoslo.
«Nunca enantes hubo un grupu de neñes y neños tan bayurosu cantando asturianada. ¿Qué pueden ser 30? ¿40? Claro que nun son munchos y que faen falta más recursos a tolos niveles pero los que tenemos son un regalu qu’hai que cuidar y apurri-yos espacios dignos pa que canten. Xente dende los 8 a los 20 años que lo mesmo siente a Bad Bunny qu’a Los Cuatro Ases y que xuben al escenariu con una elegancia que ye una maraviya»
Y nesa dicotomía ente caltener lo puro de la tradición y esperimentar con ella. ¿Cuála ye la to postura?.
Tien d’haber espaciu pa too pero ye importante respetar esos espacios. Lo ideal sedría entendemos, texer redes, escuchase y que too ello tenga’l so llugar. Gústame la sidra bien escanciao que faiga vasu y con pegue pero nun refugo tomar una copa de sidra de xelu. Al final ye una cuestión d’apreciar y tener arguyu por defender lo de nueso. Por poner el casu, almiro tanto’l trabayu de Maria Luisa Díaz como la propuesta de Fruela 757. Son persones en momentos y con circunstancies vitales y cualidaes estremaes pero hai que poner en valor lo caúna d’elles ufre pa la música asturiana. Y hai un filu común nesta hestoria y ye que a toes y toos nos vien heredao y la mesma hestoria atestigua la güelga que vamos dexar, o non.
Tamién hai voces crítiques colos concursos y col que’l circuitu de l’asturianada lléndese a ellos prácticamente.
Los concursos tienen como oxetivu premiar les meyores voces, que los y les intérpretes remanen el repertoriu y dominen la técnica. Suponen un retu de meyora constante. Ye verdá qu’en función de les diferentes fases queden p’atrás munches persones pero tamién elles dan vida a l’asturianada y nos concursos pueden topar espacios dignos donde poder cantar. En cuantes a les crítiques cuido que too ye meyorable siempres, nin tolos concursos son iguales nin son perfectos.
«Lo ideal sedría entendemos, texer redes, escuchase y que too ello tenga’l so llugar. Al final ye una cuestión d’apreciar y tener arguyu por defender lo de nueso. Almiro tanto’l trabayu de Maria Luisa Díaz como la propuesta de Fruela 757. Son persones en momentos y con circunstancies vitales y cualidaes estremaes pero hai que poner en valor lo caúna d’elles ufre pa la música asturiana»
Volviendo a les dos asociaciones nes que participes, la vuestra actividá céntrase en Siero, el cuartu Conceyu d’Asturies en cuantes a población y PIB. A mí llámame l’atención que pal tamañu, pesu económicu y montonera de músicos que tien, la mayor parte de l’actividá cultural vien per parte d’iniciatives privaes y asociatives, siendo mui escasa la programación musical que fai l’Ayuntamientu. ¿Cómo valores tú les polítiques que tán desendolcándose y qué propuestes tienes?
¡Cuidaín cola entruga! (rises) Toi dalcuerdu contigo pero hai que facer un análisis bien fondu. Yo soi un recién llegáu y ando pelo segao (nun seya que les mios pallabres puedan ofender a la xente de pedigrí polesu). Sicasí en La Pola, que ye capital d’asturianía, les trés fiestes más importantes tán dirixíes por una asociacion (festexos), que tien rexistrao la propiedá de too ello y que nos años caberos tien un conflictu directu con too quisqui (xente socio y Ayuntamientu). L’asuntu ye qu’esta cuestión de delegar o privatizar la cultura, polo que fuere, vien de tiempu p’atrás. Ye un tema sensible por cómo dalgo que ye del pueblu, nun momentu dau privatizóse y tiempu dempués xeneró una crispación que fizo perder el rumbu. Nun lo entiendo y nun me gusta un res. Per otru llau, yo que toi en delles asociaciones que defienden la tradición, agora mesmo siento l’amparu de l’alministración. Hai una predisposición mui afayadiza por parte de la FMC y de la Conseyería de Cultura pa coles propuestes. La directora que garró’l cargu va poco más d’un añu ta faciendo un trabayu con munchu altor. De política, prefiero nun opinar. La mio propuesta personal ye nidia: apueste claro por toles iniciatives de casa y devolvéi la fiesta al pueblu. Y por supuesto reclamar más espacios culturales públicos.
Suscríbite a les nuestres novedaes
