Esti sábadu a les 19h el Teatru de La Llaboral de Xixón acueye l’actu d’inauguración de la XIV edición del MUSOC (Muestra de Cine Social y Derechos Humanos d’Asturies). L’actividá va tar presentada pola periodista y escritora Aitana Castaño; va proyectase la película d‘Alejandro Nafría MCA, La Llucha Eterna; y la música asturiana va tener protagonismu con un conciertu de Silvia Quesada y Alfredo González y una actuación bien orixinal de David Varela xunto a la Charanga Ventolín, que tamién quedó grabada nel documental.
«Cuando los responsables de la película taben recopilando materiales pa facela apaeció una lletra mui vindicativa que relata los entamos del Pinón Folixa, el chigre social que taba asociáu al MCA (Movimientu Comunista d’Asturies), que se montó per primer vegada nel Pueblu d’Asturies y onde daquella yá actuó la Charanga Ventolín», cunta’l músicu David Varela pa desplicar la so participación nel documental y nesti actu. «A cuenta d’eso, guionistes y director decidieron reinterpretar esa lletra cola música de los Monthy Pyton y reellaboralo pa que la Charanga Ventolín fixera la versión musical y pa la lletra decidieron cuntar conmigo pa interpretala mazcaritándome de Pinón Folixa, el personaxe d’esti chigre social que nun dexa de ser un Groucho Marx a l’asturiana, con montera», añade Varela.
D’esta manera la película MCA, La Llucha Eterna rexistra esa reinterpretación del cantar y nel actu d’inauguración del MUSOC d’esti sábadu va poder vese l’actuación en directo de la Charanga Ventolín xunto a David Varela reconvertíu en Pinón Folixa,»escenificándolo por facer un poco la comedia» y cantando la lletra «que cunta tola historia del chigre y anécdotes del MCA» y qu’anque «orixinalmente ta nun castellanu un pelín amestáu», el músicu asturianízala más porque, como reconoz, asina-y «sal de dientro a la hora de cantales».
Suscríbite a les nuestres novedaes
